دیمەنی کۆڵانێکی گەڕەکی فەرمانبەرانی قەڵادزێ.وێنە.سۆشیال میدیا
فەرمانبەرانی قەڵادزێ داوای قیر دەکەن
964+
توانا نەقی
یەکێک لە گەڕەکەکانی قەڵادزێ کە ماوەیەکی زۆرە لە چاوەڕوانی قیرکردنی گەڕەکەکەیانن پارەیان بۆ خەرج ناکرێت و هێشتا تەواو نەکراوە.
گەڕەکەکە ناوی فەرمانبەرانە و بە قسەی شارەوانی هەموو شتێکی لەلای ئەوانەوە تەواو بووە، بەڵام پارە بۆ بەڵێندەر خەرج ناکەن بۆ ئەوەی قیرەکەی بکات.
ئارام عەلی سەرۆکی شارەوانی قەڵادزێ بە 964ـی وت، گەڕەکەکە گەورەیە و سەرجەم رێکارە ئیداری و ئەوانەی پەیوەندیدارە بە شارەوانییەوە تەواو بووە و کارەکە لای بەڵێندەرە.
وتیشی، گوژمەی پرۆژەکە 500 ملیۆن دینارە، هەرچی چەک دەکەن بۆ بانک بۆ ئەوەی بەڵێندەر پارە وەربگرێت و پرۆژەکە تەواو بکات بە بیانووی نەبوونی نەختینە پارەیان بۆ خەرج ناکرێت.
گەڕەکەکە بەهۆی بوونی قوتابخانە و فەرمەنگەی حکومییەوە گرنگە تەواو بکرێت، هەروەها وەرزی باران بارینیش نزیکە بۆیە بەڵێندەر بەڵێنی داوە کاری تیادا بکەن و قیرتاوی بکەن، سەرۆکی شارەوانی قەڵادزێ وای وت.