چین بووە براوەی گرێبەستێکی نەوتیی 194 ملیۆن دۆلاری لە عێراق

964+

هاوبەش ئەبوبەکر

حکومەتی عێراق گرێبەستێکی 194 ملیۆن دۆلاری لەگەڵ کۆمپانیایەکی هەڵکەندنی بیری نەوتی چینی واژوکرد و دەیەوێت بیرە نەوتییەکانی کێڵگەی رومەیلە پەرەپێبدات.

لە راگەیەندراوێکدا، دامەزراوەی بەرهەمە نەوتییە نیشتیمانییەکانی چین (CNPC) رۆژی پێنجشەممە 10.8.2023 رایگەیاند، کۆمپانیای داچینگی چینی بووە بە براوەی گرێبەستی کاری ئەندازیاری و بنیادنان و هەڵکەندنی بیری نەوتی کێڵگەی رومەیلەی نەوتی عێراق.

دامەزراوەکە گرێبەستەکەی بە گەورەترین گرێبەستی دەرەکی هەژمارکردووە لە ماوەی پێنج ساڵی رابردوودا کە بڕەکەی 194 ملیۆن دۆلارە.

لە راگەیەندراوەکەدا ژمارەی ئەو بیرانەی کە بەپێی گرێبەستەکە هەڵدەکەندرێت، نەخراوەتەڕوو، هەروەها باس لە ماوەی گرێبەستەکە نەکراوە.

کۆمپانیای داچینگ (Daqing Drilling Engineering Co) لە ساڵی 2010 دەستیکرد بە هەڵکەندنی بیرە نەوتییەکانی کێڵگەی رومەیلە.