وێنە: باڵەخانەی سەندیکای ئەندازیارانی کوردستان
500 هەزار پاداشت دەدرێتە ئەندازیاران
964+
هاوبەش ئەبوبەکر
ئەو ئەندازیارانەی کە لە دادگاکانی هەرێمی کوردستاندا هاوکاری دادوەرەکان دەکەن بۆ یەکلایکردنەوەی کەیسی پرۆژە ئەندازەییەکان، بە بڕی 250 هەزار تاوەکو 500 هەزار دینار پاداشت دەکرێن بۆ هەر کەیسێک.
بەپێی نوسراوێک کە ئەنجوومەنی دادوەری ئاراستەی سەرۆکایەتی دادگای تێهەڵچوونەوەی ناوچەکانی هەولێر، دهۆک، سلێمانی و گەرمیان کردووە، لەمەودوا پاداشتی ئەندازیارانی شارەزای دادگاکان بەپێی جۆری کەیس، ماوەکەی و دووری شوێنەکەی دەبێت.
نوسراوەکە لە رێکەوتی 2.7.2023 دەرچووە، وەڵامێکە بۆ داواکارییەکی سەندیکای ئەندازیارانی کوردستان کە ناڕازیبوون لە پێدانی 50 هەزار دینار بەرامبەر بەو کارەی لە دادگاکان دەیکەن.
“هەندێک لە دادوەرەکانی دادگاکان، نەک هەموویان، تەنها 50 هەزار دینار دەکەنی پاداشتی ئەو ئەندازیارانەی بەشداری ئەو پرۆسەیە دەکەن، کە زۆر جار ناکاتە نرخی بەنزینی ئۆتۆمبێلەکانیان”، سەندیکای ئەندازیارانی کوردستان وا دەڵێت.
سەندیکای ئەندازیاران داواشیکردووە، پێداچوونەوە بکرێت بەپێی جۆری کەیس و پرۆژەکە و قەبارەکەی و ماوەی پێویست بۆ لێکۆڵینەوە و دووری شوێنەکە.