سلێمانی.. کارەبای 1200 دوکان و شوێنی بازرگانی بڕدران

964+

رێژوان مامە قادر – سلێمانی

بەهۆی نەدانی پارەی کارەباکانیانەوە، 1200 دوکان و شوێنی بازرگانی لە سلێمانی کارەبایان بڕدراون کە زیاتر لە ملیۆنێک و 300 هەزار دینار قەرزدار بوون.

لە ئێستادا بەڕێوەبەرایەتی کارەبای سلێمانی هیچ مۆڵەتێک ناداتە دوکان و شوێنە بازرگانییەکان و دوکانەکان و راستەوخۆ کارەباکەیان دەبرێت، چونکە پێشتر چەند جارێک ئاگاداری کردوونەتەوە.

سیروان محەمەد، وتەبێژی کارەبای سلێمانی بە 964ی وت، دوای بڕانی کارەباکەیان ئێستا بەشێک لەو شوێنانە هاتوون پارەکەیان بدەن و رۆژانەش ئێمە کارەبای ئەوانە دەبڕین، کە زیاتر لە ملیۆنێک و 300 هەزار دینار قەرزاری کارەبان.

دەشڵێت: لە هەشت بنکەی شاری سلێمانی پارەی کارەبا وەردەگیرێت.

بەڕێوەبەرایەتی کارەبای سلێمانی، 640 هەزار هاوبەشی هەیە و 500 ملیار دینار قەرزیشیان لای هاوبەشەکانیانە بە دامودەزگا حکومییەکانیشەوە.

پێداچوونەوە: فەرمان سادق