پیاز لە بازاڕەكانی كوردستان. وێنە سۆشیاڵ میدیا
کەی پیازی خۆمانە پێدەگات
پیاز هاڕەی کرد
964+
فەرمان سادق
کیلۆی پیاز لە 2500 دینارەوە بۆ 500 دینار دابەزیوە، سەرۆکی ئەنجومەنی عەلوەی هەولێریش دەڵێت: پیازی باشوور پێگەیشتووە بۆیە وەها هەرزان بووە.
بەپێی بەدوادچوونێکی 964، کیلۆی پیازی سپی لە بازاڕ بە 500 دینار دەفرۆشرێت، هەروەها لە گومرگیش بە کۆ کیلۆی لەنێوان 250 بۆ 350 دینارە.
رەجەب عەزیز، سەرۆکی ئەنجومەنی عەلوەی هەولێر بە 964ـی وت، ئێستا لە بازاڕ پیازی ئێرانی و هیندستانی هەیە، هەروەها بەرهەمی جوتیارانی باشووری عێراقیش پێگەیشتووە، هەموو ئەوانە بە یەکەوە وایکردووە نرخەکەی لە سەرووی هەزار دینارەوە زۆر بە خێرایی دابەزێت و ئێستا بە کۆ نرخی لەنێوان 250 بۆ 350 دینارە.
دابەزینی نرخی پیاز کە مانگێک پێش ئێستا کیلۆی لە بازاڕ گەیشتبووە 2500 دینار، لە کاتێکدایە هێشتا بەرهەمی پیازی جوتیارانی هەرێمی کوردستان پێ نەگەیشتووە.
بە قسەی رەجەب عەزیز، سەرۆکی ئەنجومەنی عەلوەی هەولێر بێت، لە 15ـی مانگی داهاتووەوە وردە وردە بەرهەمی پیازی جوتیارانی هەرێمی کوردستان پێدەگات.