ئاگرەکەی پاڵاوگەی کۆچەر لە ناحیەی شەمامک کۆنتڕۆڵ کرا

ئەحمەد شەمزین – هەولێر

ئاگرەکەی پاڵاوگەی کۆچەر لە ناحیەی شەمامک کۆنتڕۆڵ کرا و تیمەکان سەرقاڵی ساردکردنەوەی شوێنەکەن.

چەند کاتژمێرێک پێش ئێستا پاڵاوگەی کۆچەر لە ناحیەی شەمامکی سەربە پارێزگای هەولێر ئاگریگرت، پەیامنێری 964 چووەتە نزیک پاڵاوگەکە و بەقسەی سەرچاوەیەکی ئەمنیی، تیمەکانی بەرگری شارستانی هەولێر ئاگرەکەیان کوژاندووەتەوە، تا ئێستاش زیانەکانی بەوردی نەزانراوە، بەڵام ئاگرەکە زیانی گیانی نەبووە و تەنیا زیانی ماددی لێکەوتووەتەوە.

ساڵی رابردووش بەدیاریکراوی رۆژی 16.5.2025 شۆفێرێک  لە پاڵاوگەی کۆچەری ناحیەی شەمامک کەوتە ناو خەزانێکی نەوتەوە و خنکا، تیمەکانی بەرگری شارستانی هەولێر بۆ دەرهێنانەوەی تەرمەکەی چوونە شوێنی رووداوەکە و لە کاتی هەوڵدان  بۆ دەرهێنانەوەی تەرمەکە، دووان لە کارمەندانی بەرگری شارستانی هەولێر کەوتنە ناو خەزانەکەوە و ئەوانیش خنکان.

پێداچوونەوە؛ شۆڕش قادری