لە بەردەڕەش دوو کەس بە رووداوی هاتوچۆ گیانیان لەدەست دا
964+
زەید کۆچەر – بەردەڕەش
له سنوورى قه‌زاى به‌رده‌ڕه‌ش و له رووداوێكی هاتوچۆدا دوو کەس گیانیان لەدەست دا و و شەشی دیکە بریندار بوون.
ئەو دوو کەسەی گیانیان لەدەستداوە دایکێکی 43 ساڵان و کچە نۆ ساڵانەکەیەتی.
رووداوەکە لە کاتژمێر 5:40 خولەکی ئێوارەى ئه‌مڕۆ 21.3.2023 روویداوە لە رێگای کەڵەک – بەردەڕەش لە نێوان ئۆتۆمبێلێکی جۆری ئۆپڵ و پیکاب.
مه‌سعود گۆران، یەکێکە لە خزمە نزیکەکانی ئەو خێزانەی کە تووشی رووداوەکە هاتوون و بە 964ى وت، “بەداخەوە ژنێك به ناوى گوڵبەهار گیانى له‌ده‌ستداوه و حه‌وت کەسیش بریندار بوون”.
964 دەزانێت، دواتر هەواڵ هاتووە، کە کچە نۆ ساڵانەکەی گوڵبەهاریش گیانی لەدەستداوە.
به قسه‌ى ناوبراو، سێ لە بریندارەکان خەڵکی گردەپانن و لە نەخۆشخانەی بەردەڕەش چارەسەریان وەرگرتووە، ئەوانی دیکە خەڵکی بەشیریانن بۆ چاره‌سه‌رى گواستراونه‌تەوه بۆ پارێزگای هەولێر.
پێداچوونه‌وه: فه‌رهاد حه‌سه‌ن
