گۆڕانکاری لە پۆستی چوار بەڕێوەبەرایەتیی ئەمنیی پارێزگای هەڵەبجەدا کرا

وریا فەتاح

نوخشە ناسیح، پارێزگاری هەڵەبجە رایگەیاند، ئەمڕۆ لە دیوانی پارێزگا مەراسیمی ئاڵوگۆڕی پۆستەکان بۆ چەند بەڕێوەبەرایەتییەکی ئەمنیی سنوورەکە بەڕێوەچووە و چوار بەڕێوەبەری نوێ دەستبەکاربوون.

بەپێی راگەیەندراوێک کە لەلایەن پارێزگاری هەڵەبجەوە بڵاوکراوەتەوە، مەراسیمەکە بە ئامادەبوونی قائیمقامی هەڵەبجە و ژمارەیەک لە بەرپرسانی ئیداری بەڕێوەچووە. گۆڕانکارییەکانیش بەم شێوەیەی خوارەوە بوون:

بەڕێوەبەرایەتیی هاتوچۆ: موقەدەم ڕێباز کەمال وەک بەڕێوەبەری نوێ، لە شوێنی عەقید عەتا بەهرام دەستبەکاربوو.

بەڕێوەبەرایەتیی پۆلیس: عەقید ستار حەمەئەمین وەک بەڕێوەبەری نوێ، لە شوێنی عەمید ئەنوەر عومەر دەستبەکاربوو.

بەڕێوەبەرایەتیی بەرگریی شارستانی: عەمید ئەنوەر عومەر وەک بەڕێوەبەری نوێ، لە شوێنی عەمید عابدین عەبدولڕەحمان دەستبەکاربوو.

بەڕێوەبەرایەتیی پۆلیسی دارستان و ژینگە: عەمید عابدین عەبدولڕەحمان وەک بەڕێوەبەری نوێ، لە شوێنی عەقید ئەرسەلان غەفوور دەستبەکاربوو.

پارێزگاری هەڵەبجە ئاماژەی بەوەشکردووە، ئەم پرۆسەیە لە چوارچێوەی پلانی جێگری سەرۆکی حکومەتی هەرێمی کوردستان و رێکارەکانی وەزارەتی ناوخۆدایە، کە ئامانج لێی نوێکردنەوەی پێکهاتەی کارگێڕی و پەرەپێدانی ئاستی خزمەتگوزارییەکانە.