ترەمپ: تەنیا کاتژمێرێکمان مابوو گورز لە ئێران بوەشێنین

وریا فەتاح

بەپێى تازەترین لێدوانى ترەمپ بێت، زۆرى نەمابوو گورز لە ئێران بوەشێنێت، دەشڵێت: ئێران لێیان دەپاڕێتەوە بۆ رێککەوتن.

کەمێک لەمەوبەر، دۆناڵد ترەم جارێکى تر لە بارەى گرژییەکانى نێوان واشنتۆن و تاران قسەى کرد و وتى،”ئێران هەرگیز نابێتە خاوەنی چەکی ئەتۆمی.”

ئاشکراشى کردووە، کە تەنیا “یەک کاتژمێر” دوور بوون لە وەشاندنی گورزێکی سەربازی لە دژى ئێران، بەڵام نەیشاردووەتەوە کە بژاردەکە بە کراوەیى ماوەتەوە و دەڵێت:”لەوانەیە ناچار بین لە داهاتوودا گورزێکی دیکە لە ئێران بوەشێنین، بەڵام دڵنیا نیم لەوەی کە ئایا روودەدات یان نا.”

وەک زۆربەى جارەکانى تر، ترەمپ هێرشی کردە سەر سیاسەتەکانی پێش خۆی و رایگەیاند، ئەگەر ئەو کۆتایی بە رێککەوتنە ئەتۆمییەکەی سەردەمی ئۆباما نەهێنایە، ئەوا بە دڵنیاییەوە ئێستا ئێران خاوەنی چەکی ئەتۆمی دەبوو. هەروەها ئاماژەی بە لاوازیی پێگەی ئێستای تاران کرد و وتی: “ئێران ئێستا دەپاڕێتەوە بۆ ئەوەی رێککەوتنێکمان لەگەڵ واژۆ بکات.”

ئاماژەی بە رۆڵی وڵاتانی عەرەبی ناوچەکە کرد لە هەوڵەکانی دیپلۆماسی و رایگەیاند: “سعودیە، ئیمارات، قەتەر و هەندێک لە وڵاتانی دیکەی کەنداو دڵنیاییان پێدام کە هەواڵی باش هەیە سەبارەت بە دانوستانەکان.”