تا قیستەکانیان نەدەن ناتوانن بچنە هۆڵی تاقیکردنەوە
داشکاندنی 20٪ـی خوێندن شمولی خوێندکارانی زانکۆ و پەیمانگا ئەهلییەکان ناکات
964+
ئەحمەد شەمزین – هەولێر
داشکاندنی 20٪ـی خوێندن شمولی خوێندکارانی زانکۆ و پەیمانگا ئەهلییەکان ناکات و تا قیستەکانیان نەدەن، ناتوانن بە سیستمی ئۆنلاین بەردەوام بن لە خوێندن.
ئەو خوێندكارانە باس لەوە دەكەن کە لەلایەن كارگێری زانكۆ و پەیمانگاكانەوە ناچار كراون، ئەگەر قیستی خوێندن نەدەن، ئەوا ناچنە ناو تاقیكردنەوەكان و داخیلی سیستەمی ئۆنلاین نابن بەبێ ئەوەی رەچاوی بارودۆخی ئێستای کوردستان و خوێندکاران بكەن.
ئەمڕۆ سێشەممە 31.3.2026 پەیامنێری 964 داواكاری ئەو خوێندكارانەی گەیاندە وەزارەتی خوێندنی باڵا، عەباس ئەکرەم وتەبێژی وەزارەت بە 964ـی وت، “تا ئێستا هیچ بریارێك نییە بۆ داشكاندن بۆ زانكۆ و پەیمانگا تایبەتەكان و هەر بڕیاریك هەبێت راستەوخۆ بڵاوی دەكەینەوە و دەبێت زانكۆكان پابەند بن پێوەی”.
رۆژی پێنجشەممە 26.3.2026 وەزارەتی خوێندنی باڵا و توێژینەوەی زانستی هەرێم بڕیاریدا بە داشکاندنی کرێی خوێندن بە ڕێژەی (20٪) سەرەڕای داشکاندنی پێشوو کە بریتییە لە رێژەی (45٪) بەمەرجێک قوتابی / خوێندکار تاوەکو 3.5.2026 تەواوی قیستەکانی بدات.
بڕیارەکە سەرجەم ئاستەکانی خوێندنی بەرایی (پارالێل و ئێواران) و خوێندنى باڵا (دیبلۆمی باڵا، ماستەر، دکتۆرا) بۆ ساڵی خوێندنی (2025-2026) زانکۆ حکومییەکان دەگرێتەوە.
پێداچوونەوە؛ شۆڕش قادری
