چوارەم کەس بەهۆى لافاوەوە گیانى لەدەستدا؛ منداڵێک لە خانەقین خنکا

964+

میلاد جەلال- گەرمیان

شەپۆلی بارانبارین و لافاو کە چەند رۆژێکە ناوچە جیاجیاکانی هەرێمی کوردستانی گرتووەتەوە، قوربانییەکی دیکەی لێکەوتەوە و لە قەزای خانەقین منداڵێکی تەمەن 13 ساڵان گیانی لەدەستدا.

شوان شاکر، بەڕێوەبەری نەخۆشخانەی خانەقین بە 964ـی راگەیاند: “دوای نیوەڕۆی ئەمڕۆ شەممە، نزیک کاتژمێر 2:00، تەرمی منداڵێکی تەمەن 13 ساڵان گەیەندرایە نەخۆشخانەکەمان کە بەهۆی لافاو و کۆبوونەوەی ئاوی بارانەوە گیانی لەدەستدابوو.”

بەوتەی بەڕێوەبەری نەخۆشخانەکە، ئەو منداڵە کە لە نەتەوەی عەرەبە، لە گەڕەکی بەختیاریی قەزای خانەقین کەوتووەتە ناو ئاو و خنکاوە، دواتر تەرمەکەی رەوانەی پزیشکی دادی کراوە.

گیانلەدەستدانی ئەم منداڵە لە خانەقین، ئاماری قوربانیانی ئەم شەپۆلەی بارانبارین لە ناوچە جیاجیاکان گەیاندە چوار کەس، کە بەهۆی لافاو و کەوتنە ناو ڕووبارەکانەوە بوونەتە قوربانی:

 لە سنووری سەنگەسەر: شۆفێرێک بە ئۆتۆمبێلەکەیەوە کەوتە ناو رووباری “گافڕێن”، دوای سێ ڕۆژ گەڕانێکی بەردەوام، تەرمەکەی دۆزرایەوە.
 لە زاخۆ: گەنجێک لەسەر رووباری کۆڕنیشی زاخۆ کەوتە ناو ئاوەکەوە و سەرەڕای هەوڵەکان، تا ئێستا تەرمەکەی نەدۆزراوەتەوە.

 لە کەرکوک: کەسێکی دیکە لە سنووری پارێزگای کەرکوک کەوتە ناو رووبارێکەوە و دوای ماوەیەک تەرمەکەی لەلایەن تیمەکانەوە دۆزرایەوە.
 لە خانەقین: منداڵێکی 13 ساڵان بەهۆی کۆبوونەوەی ئاوی باران لە گەڕەکی بەختیاری خنکا.

پێداچوونەوە؛ وریا فەتاح

دوای خنکانی گەنجێک کۆرنیشی زاخۆ بە چوپ تەنرا