لە قەزاى پشدەر
یارییکردن بە گولـلە هاوەنێک کۆتایی بە ژیانی مێردمنداڵێک هێنا
964+
وریا فەتاح
پێشنیوەڕۆی ئەمڕۆ شەممە، رووداوێکی دڵتەزێن لە سنووری قەزای پشدەر روویدا، کاتێک مێردمنداڵێک دەستکاریی گولـلە هاوەنێکی کردووە و پێیدا تەقیوەتەوە.
راستی زوودی، لێپرسراوی فریاکەوتنی نەخۆشخانەی قەڵادزێ بە 964ـی وت، مێردمنداڵەکە تەمەنی 15 ساڵە و خەڵکی گوندی (بادینباڵە) لە سنووری ناحیەی هەڵشۆ.
بەپێی وتەی راستى زوودى، رووداوەکە لە کاتێکدا بووە کە مێردمنداڵەکە دەستکاریی گولـلە هاوەنێکى پاشماوەى جەنگى کردووە و پێیدا تەقیوەتەوە، بەهۆیەوە راستەوخۆ گیانی لەدەستداوە.
دوای ئەوەی تەرمەکەی گەیەندراوەتە نەخۆشخانە و رێککارەکان تەواو کراون، رادەستی کەسوکارەکەی کراوەتەوە تا لە گوندەکەی خۆیان بە خاک بسپێردرێت.
