"شۆفڵ لە شوێنی مزگەوت دراوە"
دانیشتووانی گەڕەکێکی کەرکوک ناڕازین؛ “بەناوی حکومەت زەوی داگیر دەکرێت”
964+
کاروان ساڵحی – کەرکوک
دانیشتووانی گەڕەکی وەحدە لە کەرکوک ناڕازین و دەڵێن، کەسانێک دەیانەوێت بەناوی حکومەتەوە دەست بەسەر زیاتر لە 240 دۆنم زەوی وەزارەتی بەرگریدا بگرن و بیکەن بە گەراج و دوکانی فرۆشتنی گەچ و کەرەستەی بیناسازی.
دیار حاتەم یەکێک لە دانیشتووانی گەڕەکەکە قسەی بۆ مایکی 964 کردووە و دەڵێت، “بەرامبەرمان جێگەی مزگەوتە، وەبەرهێنەر هاتووە شۆفڵی لێداوە و رماندوویەتی و حکومەتیش ئاگای لێ نییە”.
“ئەم عەرزە 243 دۆنمە، بەناوی حکومەت داگیر و بەش بەش دەکرێت، کێ قبوڵیەتی ئەم چیمەنتۆ و گەچ و لمە لە ناوەڕاستی شار دابنرێت و ژینگە پیس بکات”، دیار حاتەم وای وت.
ئەحمەد سەرداریش ئەو کارە بەجۆرێک لە تەعریب ناو دەبات و دەڵێت، “کەس نازانێت ئەمانە کێن و ئەمری کێیان پێیە، دەیانەوێ لەناو ماڵەکان چەو و لم دابنێن، هیوادارین ببێتە مەشروعێکی خۆش و دڵ بکاتەوە”.
پێداچوونەوە؛ شۆڕش قادری
