دوو منداڵیان لە مەسعەدەکە دەرهێنا و ژیانیان لە مەترسیدا بوو

964+

ئەحمەد محەمەد – سلێمانی

ئەمڕۆ هەینی 6.2.2026  دانیشتووانی گۆیژە سیتی لە سلێمانی، گردبوونەوە و بێزاریی خۆیان لە کێشەکانی ناو سیتییەکە و کەموڕییەکان دەربڕی، هاوڵاتییەکی دانیشتووی ئەوێش ئاشکرای کرد، دوو منداڵ لە مەسعەدی یەکێک لە شوقەکان گیریان خواردبوو، بەرگریی شارستانی رزگاری کردوون.

هاوراز بورهان یەکێکە لە دانیشتووانی سیتییەکە و بە وردی باسی لە کەموکوڕییەکانی سیتییەکەی بۆ 964 کرد، وتیشی، ئەو کێشانە هی ئێستا نین و هی دە ساڵ لەمەوبەرە.

ئەو باسی ئەوەی کرد، کارەبا و ئاویان نییە، جگە لەوە بێ خزمەتگوزاییە، ئەمەش وایکردووە ژیانیان سەخت بێ و نرخی شوقەکانیش زۆر دابەزێت.

هەروەها ئاشکرای کرد ئەمڕۆ بەهۆی پچڕانی کارەبا دوو منداڵ لە مەسعەدی شوقەکاندا گیریان خوارد و تیمی بەرگریی شارستانی هاتوون رزگاریان کردوون.

بەناز ئەحمەد دانیشتوویەکی دیکەی شوقەکانی گۆیژە سیتییە و ئەویش باسی کۆمەڵێک کێشەی کرد و ئەوەشی خستەڕوو، کە کۆبوونەوەیان لەگەڵ ئیدارەی سیتییەکە کردووە و ئەوانیش دەڵێن کەموکوڕی و کێشە هەیە، بەڵام چارەی ناکەن.

ئاشکرای کرد کە هێشتا شوقەکانیان بەناو نەکراوە و تاپۆ نییە.

پێداچوونەوە: ئەرسەلان عەبدوڵا

پێوەری زیرەک بۆ سەرجەم سیتییەکان دادەنرێ