نەسرین عەبدوڵا، فەرماندەی یەکینەکانی پاراستنی ژنان
"سوریا مرد"
نەسرین عەبدوڵا: کۆبانێ لەژێر “قڕکردن”دایە و داعش بە مۆدێلێکی نوێ گەڕاوەتەوە
964+
وریا فەتاح
نەسرین عەبدوڵا، فەرماندەی یەکینەکانی پاراستنی ژنان (YPJ) لە کۆنگرەیەکی رۆژنامەوانیی ئۆنلایندا لە ناو جەرگەی شاری کۆبانێوە، رەوشی شارەکەی بە “مەترسیدار” وەسف کرد و رایگەیاند، ئەوەی ئێستا روودەدات هەوڵێکە بۆ دووبارە ئاوەدانکردنەوەی دەوڵەتی داعش بە مۆدێلێکی نوێ.
نەسرین عەبدوڵا وتیشى،”کۆبانێ لە هەر چوار لایەوە دەورەدراوە. هێرشەکان لە دەروازەی “سیرین”ـەوە ، کە سێ کیلۆمەتر لە شارەکەوە دوورە، زۆر چڕن.
گرنگترین لێدوانەکانى نەسرین عەبدوڵا:
سەرجەم گوندە کوردنشینەکانی نێوان سیرین و کۆبانێ ئاوارە بوون و پەنایان بۆ ناو شارەکە هێناوە.
ئەو هێزانەی هێرش دەکەن (سوپای سووریا و گرووپە چەکدارەکان) “چەکی تورکی” بەکاردەهێنن.
چەند ڕۆژێکە ئاو و کارەبا لەسەر کۆبانێ بڕاوە و لە ناو سەرمایەکی تونددا، خەڵک لە رەوشێکی مرۆیی زۆر قورسدا دەژین.
سووریا مرد، ئێستا داعش بە مۆدێلێکی نوێ و بە هەمان رەفتار و رێبازی جاران هاتووەتەوە، دیمەنەکان پێمان دەڵێن کە ئەمانە خەریکی دروستکردنەوەی دەوڵەتی “داعشن.”
لە کۆتایى کۆنگرەکەدا، فەرماندەکەی یەپەژە پەیامێکی توندی ئاراستەی هێزە هێرشبەرەکان کرد و وتی: “پەیمان دەدەین خۆمان رادەست نەکەین. ئەوان دەیانەوێت ئێمە خۆمان بدەینە دەست بکوژەکانمان، بەڵام ئەمە روونادات.”
