ئەمشەو كلاسیكۆیە
“یاری لە ئیسكان نەبێت درۆیە و تامی نییە”
964+
عەبدولعەزیز خالند
هاندەرانی وەرزشی و وەرزشدۆستان سەرەڕای سەرمای كەشی هەولێر، بەڵام بە ژمارەیەكی زۆر لە شەقامی ئیسكان دانیشتوون و چاوەڕێی یاریی كلاسیكۆی نێوان بارسێلۆنا و ریال مەدرید دەكەن.
ئەمشەو یاریی كلاسیكۆی جامی سوپەری ئیسپانیا بەڕێوەدەچێت، كە یاریی كۆتاییە، هاندەرانی هەردوو یانە لە هەولێر چاوەڕیی یارییەكەن و هەریەكەیان دەستی لەسەر دڵیەتی و چاوەڕێی بردنەوەی تیپەكەیەتی.
ناسڕ حەسەن هاندەری وەرزشییە و بە 964 وت، پێشبینیی بردنەوەی بارسێلۆنا دەكات و پێشی وایە یاریی كلاسیكۆ لە ئیسكان تاموچێژی خۆی هەیە و خەڵك گوێ بە سەرما نادات.
هەروەها رەشید یاسین بە درێسێكی قۆڵكورتی ریال مەدریدەوە دانیشتووە و دەڵێ، “یاری لە ئیسكان نەبی درۆیە و تامی نییە”،
رەشید خەڵكی خەباتە و پێی وایە، ئەمشەو ریال دەباتەوە 3-2 گۆڵ.
ئەو دەڵێت، هەر كاتێك یارییەكی بەهێز هەبێ لە خەباتەوە دێتە هەولێر و لە ئیسكان سەیری دەكات.
پێداچوونەوە: ئەرسەلان عەبدوڵا
