پلەی گەرماش نزم دەبێت
ئەم شەپۆلی بەفر و بارانە دوای نیوەڕۆی ئەمڕۆ کۆتایی دێت
964+
شۆڕش قادری
ئەم شەپۆلی بەفر و بارانە دوای نیوەڕۆی ئەمڕۆ کۆتایی دێت و پلەکانی گەرماش بەنزمی دەمێنێتەوە.
محەمەد کەمال شارەزای کەشناسی بە 964ـی وت، “لە دوێنی ئێوارەوه تا ئەمڕۆش بارانبارین لەناوچه جیاجیاکانی هەرێمی کوردستان بەردەوامی هەبووه و رێژەیەکی باشی باران تۆمار کراوه، لەناوچە شاخاویەکانیش بەفر باریوه، ئەوەشی پێشبینی نەکراو بووه، لە سۆران و خەلێفان و رواندز بەفر ناوچەکەی سپیپۆش کردووه و بڕی چوار بۆ شەش سانتیم بەفر باریوه”.
ئاماژەی بەوەشکرد، لە ئێستادا شەپۆلەکه لە سنووری پارێزگاکانی هەولێر و دهۆک و کەرکوک و گەرمیان کۆتایی پێهاتووه و ئەوەی ئێستا ناوبەناو باران بەردەوامە، لە سلێمانی و راپەڕین و هەڵەبجه و دەورووبەریەتی لەگەڵ ناوچەکانی دەورووبەری سۆران و مێرگەسۆر.
محەمەد کەمال وتیشی، بەپێی پێشبینییەکان لە کاتژمێر 1 بۆ 3ـی پاشنیوەڕۆی ئەمڕۆ شەممە 10.1.2026 بەیەکجاری شەپۆلەکە کۆتایی دێت و کەشوهەوا ئاسایی دەبێتەوە، پلەکانی گەرماش بەنزمی دەمێنێتەوه بەتایبەت لەشەودا.
شەپۆلێکی دیکەی بەفر و باران رۆژی هەینی دەگات
