تاكسییەک نەخۆشانی شێرپەنجە و كەسوكاریان بەخۆڕایی دەگوازێتەوە

+964

رێباز خدر

گەنجێکی شاری هەولێر بەناوی محەمەد هیوا، کە خاوەنی ئۆتۆمبێلی تەکسییە، خزمەت بە تووشبوانی شێرپەنجە دەکات و بێ بەرامبەر نەخۆش و کەسوکاری نەخۆش لە نەخۆشخانەی نانەکەلی دەگوازێتەوە بۆ ناو شار و دەرەوەی شاری هەولێر.

محەمەد هیوا، كە تەمەنی 25 ساڵە، بە 964ی وت، “بەر لەوەی ئەم ئۆتۆمبێلە بکڕم بەڵێنم بە خوای گەورە دا، ئەگەر رۆژێک ببمە خاوەنی تەکسییەک، ئەوا بەخۆڕایی تووشبوانی شێرپەنجە دەگوازمەوە بۆ نەخۆشخانە و بۆ ئەو شوێنەی کە دەیانەوێت، خەونەکەشم هاتە دی و زۆر ئاسوودەم لەگەڵ ئەنجامدانی کارەكەم”.

دەشڵێت، ئامانج لەم کارەم تەنیا رازیبوونی خوایە لێم و هاوکاریی کەسانی نەخۆش و کەمدەرامەتەکانە، تەنیا بۆ نەخۆشانی نەخۆشخانەی نانەکەلییش نییە، بەڵکو بۆ هەر تووشبوویەكی شێرپەنجەیە لە هەر نەخۆشخانە و سەنتەرێک بێت، هەروەها بۆ کارمەندانی نەخۆشخانەی نانەکەلییش بێ بەرامبەرە.

پێداچوونەوە: ئەرسەلان عەبدوڵا