چیرۆکی ئەو گەنجەی بەبێ بینایی بووەتە راهێنەر و نووسەر و ژەنیار
گۆڵپارێزێک بە “گوێچکەکانی” تۆپ دەگرێتەوە
964+
ئاکام غەفور – سۆران
لەدەستدانی بینایی نەبووەتە بەربەست لەبەردەم ژیانی جەمالدا؛ ئەو وەک هەر مرۆڤێکی ئاسایی ژیان دەکات بێ ئەوەی پێویستی بە هاوکاریی کەس هەبێت، کارەکانی رۆژانەی رادەپەڕێنێت.
جەمال نموونەیەکی باڵای کۆڵنەدان و بڕوابەخۆبوونە، سەرەڕای نابینایی، بەردەوام لە یاریگاکان دەبینرێت و وەک راهێنەر سەرپەرشتیی تیپەکان دەکات، ئەو تەنانەت وەک گۆڵپارێزیش یاری دەکات و تەنیا لە رێگەی دەنگی تۆپەکەوە، ئاڕاستەی لێدانەکان دەزانێت و بەرپەرچیان دەداتەوە.
جەمال رەسوڵ، کە تەمەنی 37 ساڵە و خەڵکی گوندی “رۆست”ی ناحیەی سمێلانە، چیرۆکی خۆی بۆ 964 دەگێڕێتەوە و دەڵێت: “تەمەنم تەنیا شەش مانگ بوو کە بەهۆی تەقینەوەیەک لە ماڵەکەماندا، پێنج ئەندامی خێزانەکەم گیانیان لەدەستدا و منیش بیناییم لەدەستدا.”
بەڵام ئەم رووداوە دڵتەزێنە نەیتوانیوە لە جووڵەی بخات؛ ئەو ئێستا نووسەرە و کتێبی هەیە، ژەنیاری ئامێری سازە و وەرزشوانێکی کارامەشە.
هەرچەندە ژیان بەبێ بینایی ئاڵنگاریی خۆی هەیە، بەڵام جەمال بەتەواوی پشت بە خۆی دەبەستێت، ئەو پەیوەندییەکی بەتینی لەگەڵ دونیای وەرزشدا هەیە و لە زۆربەی پێگەکانی یاریگادا ئەزموونی یارییکردنی هەیە.
پێداچوونەوە: ژێوار خدر
