"نرخەکەی یەک ملیۆن و 500 هەزار دینارە"
شاهینە راوکراوەکە رادەستی پۆلیسی دارستان و ژینگەی گەرمیان کرایەوە
964+
میلاد جەلال – گەرمیان
ئەو شاهینەی لە گەرمیان راو کرابوو، رادەستی پۆلیسی دارستان و ژینگە کرایەوە و راوچییەکانیش دەڵێن، بابەتە گەورە کرا و نرخی باڵندەکە تەنیا یەک ملیۆن و 500 هەزار دیناری عێراقییە.
ئومێد مەجید یەکێک لەو راوچیانەی شاهینەکەیان راوکردبوو، بە 964ـی وت، “هەویەی رەسمی بەغدامان هەیە و لەژێر دەسەڵاتی سوپای عێراقداین و هەر بۆ خۆشی لە سنووری قەرەتەپە و جەبارە، باڵندەکەمان راو کرد”.
وتیشی، ئەوەی کە دەوترێت نرخی ئەم باڵندەیە لە یەک ملیۆن دۆلار نزیک دەبێتەوە، دوورە لە راستییەوە و تەنیا یەک ملیۆن و 500 هەزار دیناری عێراقی دەکات.
هەفتەی رابردوو ڤیدیۆی راوکردنی ئەم باڵندەیە لەلایەن چەند راوچییەک بڵاوکرایەوە و ئەوەش ناڕەزایەتی چالاکان و رێکخراوەکانی ژینگەیی لێکەوتەوە و دادگای کەرکویش بڕیاری دەستگیرکردنی بۆ راوچییەکان دەرکرد.
پێداچوونەوە؛ شۆڕش قادری
ئەو راوچیانەی شاهینەکەیان راو کرد خۆیان رادەست دەکەن
