یاد نەقشبەندی بۆ 964 قسەدەکات
گرانە و رەنجی دەوێ؛ نەخۆش هەیە دەرمانەکەی بە 12 ملیۆن دینارە
964+
دیلان محەمەدجەزا – سلێمانی
بەڕێوەبەری نەخۆشخانەی هیوا دەڵێ، بۆ هەندێک جۆری دەمان کە گرانن و کەمتر دەستدەکەون، گرفتی کەمی و دەستنەکەوتنیان هەیە، ئێستا جۆرێک دەرزییان نییە کە بۆ 21 رۆژ نرخی دوو دانەی بە 12 ملیۆن دینارە.
ئەو نیگەرانی لەوە هەبوو، هەر شارێک تایبەتمەندی بۆ پسپۆڕییەک وەرگرت، پێویست دەکات گرنگی و تایبەتمەندی پێ بدرێ، نەک ئەو نەخۆشخانەی هیوای لە سلێمانی کرایەوە، لە شارەکانی دیکەش بکرێتەوە، لە کاتێکدا ئەو دەڵێ، نەخۆشی هیچ ناوچەیەک لە ناوخۆی هەرێمی کوردستان و عێراق رەتناکەنەوە و چارەسەریان بۆ دەکەن.
یاد نەقشبەندی، بەڕێوەبەری نەخۆشخانەی هیوا ئەم ئێوارەیە قسەی بۆ 964 کرد و باسی لەوەکرد، لەرووی دەرمان دۆخی باشە، بەڵام بێ گرفتی دەرمانو جێگە نییە، هەندێکجاریش رێنمایی و قورسکردنی دەستگەشتن بە هەندێک دەرمان گرفت دروست دەکەن.
لەبارەی کەیسەکانی شێرپەنجە، ئەو وتی بۆ ئەمساڵ و تا مانگی 10، لە نەخۆشخانەی هیوا دوو هەزار و 800 حاڵەتی نوێی شێرپەنجەیان تۆمارکردووە، کە لەسەرجەم ناوچە جیاوازەکانەوە هاتوونەتە سلێمانی و دیارترینیان، شێرپەنجەی مەمک بووە.
ئەوە لە کاتێکدا، هەر دوێنێ،تەندروستی سلێمانی رایگەیاند، یەکەم نەشتەرگەری شێرپەنجەی مەمک لە نەخۆشخانەی جەمالی حاجی عەلی ئەنجامدراوە و وابڕیارە بۆ لەمەودوا، سەرجەم ئەو نەشتەرگەریانەی کە لە کەرتی حکومی بۆ توشبووانی شێرپەنجەی مەمک دەکرێت، بە خۆڕایی و بێ بەرامبەر لەو نەخۆشخانەیە ئەنجام بدرێت.
ئەم مانگە بە مانگی پەمەیی و رووبەڕووبوونەوەی نەخۆشی شێرپەنجە دیاریکراوە و چەندین چالاکیش بۆ هۆشیارکردنەوەی هاوڵاتیان لە ناوچە جیاجیاکانی کوردستان بەڕێوەچووە.
دارشتنەوە: ئەحمەد مستەفا
لە پێنج ساڵدا 25 پیاو تووشی شێرپەنجەی مەمک بوون
