سەڵاحەدین دەمیرتاش - وێنە: ئاژانسەکان
لە زیندانەوە پەیامى ئاشتیان پێیە
شاندى ئیمڕاڵى سەردانى دەمیرتاشیان کرد
964+
ژووری هەواڵ
ئەمڕۆ پێنج شەممە 23ـی تشرینی یەکەم، پەروین بوڵدان و میتهات سەنجار لە شاندى ئیمڕاڵى، چوونە زیندانى ئیدرنە و سەردانى هەریەک لە سەلاحەدین دەمیرتاش، فیگەن یوکسەکداغ، سەلوک مزراقلی و سەمرا گوزەلیان کردووە و بەیەکەوە باسی پڕۆسەی ئاشتیان کردووە.
بەپێى راگەیەندراوى شاندەکە، دۆخی تەندروستی دەمیرتاش و هاوڕێکانی زۆر باش بووە و لەهەمان کاتدا مۆڕاڵێکی بەرزیان هەبوو و دووبارەیان کردۆتەوە کە ئەوان پشتگیری پرۆسەی ئاشتین.
ئاماژە بەوەش کراوە کە دەمیرتاش لە قسەکانیدا وتویەتى،” ئەوەی لەدەستی من بێت بۆ سەرخستنی پڕۆسەی ئاشتی ئەنجامی دەدەم، تەندروستیم باشە و مۆڕاڵی من زۆر بەرزە و بەردەوام دەبم لە پشتیوانی ئاشتی لەم وڵاتەدا”.
دەمیرتاش بە گرنگیەوە باسی لە رۆڵی لایەنە جیاوازەکانی کردووە و وتویەتی،” لەسەر هەموو لایەنەکان پێویستە کار بۆ کۆمەڵگایەکی ئاشتی و دیموکراسی بکەن”.
لە راگەیەندراوەکەدا هەر یەکە لە پەروین بوڵدان و میتهات سەنجار، داوا لە تورکیا دەکەن بەزوترین کات، سەڵاحەدین دەمیرتاش و فیگەن یوکسەکداغ و زیندانی سیاسی ئازاد بکات، چونکە وەک دەڵێن: هێشتنەوەی ئەوان لە زینداندا تاوانێکی گەورەیە و بە هیچ شێوەیەک قبوڵ ناکرێت”.
