شارەوانیی هەولێر داوا دەكات لایەنە سیاسییەكان سیمای شار نەشێوێنن

964+

ئەرسەلان عەبدوڵا

سەرۆكی شارەوانیی هەولێر بە لایەنە سیاسییەكانی بەشدار لە هەڵبژاردنی عێراق دەڵێت، پێویستە لە بانگەشەی هەڵبژاردن سیمای جوانی شەقامەکانی هەولێر بپارێزن و پابەندی رێنماییەکانمان بن.

كارزان عەبدولهادی ئەمڕۆ یەكشەممە 5.10.2025 بە 964ی راگەیاند، لەگەڵ ئەوەی بانگەشەی هەڵبژاردن مافێکی سروشتیی لایەن و كاندیدە بەشدارەكانە، بەڵام نابێت ببێتە هۆی شێواندنی سیمای شار و تێکدانی سەوزایی دوورگە ناوەندییەکانی شەقامەكان.

وتیشی، هەر حزب و لایەنێك پابەندی رێنماییەكان نەبن و سیمای شار و شەقامەكان تێكبدەن، رێکاری یاساییان لە بەرامبەردا دەگرنەبەر.

كارزان عەبدولهادی، ئەوەشی باس كرد، دوێنێ لەگەڵ سەرۆک بەشەکانی سنووری سەرۆکایەتیی شارەوانیی هەولێر کۆبووەتەوە و باسیان لە چاودێریکردنی بەردەوام بۆ هەموو ئەو وێنە و پۆستەرانە كردووە، كە لەلایەن لایەنە سیاسییەکان هەڵواسراون بۆ بانگەشەی هەڵبژاردنی پەرلەمانی عێراق.

رۆژی هەینیی رابردوو بانگەشەی هەڵبژاردنی خولی شەشەمی پەرلەمانی عێراق دەستیپێكرد و بڕیارە لە 11.11.2025یش هەڵبژاردنی گشتی بەڕێوەبچێت.

لەسەر گردێکی شوێنەواری لۆحە بۆ بانگەشەیی هەڵبژاردن دانراوە