موعین ئەسفەهانی لە هەولێر كۆنسێرت ناكات

ئەرسەلان عەبدوڵا

لە رۆژانی رابردوو ریكلامێكی ڤیدیۆیی بۆ بەڕێوەچوونی كۆنسێرتی گۆرانیی هونەرمەندی ناوداری فارس موعین ئەسفەهانی لە هەولێر بڵاوكرایەوە، بەڵام بەڕێوەبەری كارەكانی پێی زانیوە و لە ڤیدیۆیەكدا هەواڵەكەی بە درۆخستەوە.

لە ڤیدیۆیەكدا كە شەوی رابردوو لە ئەكاونتی فەرمیی هونەرمەند موعین ئەسفەهانی لە ئینستاگرام بڵاوكرایەوە، تێیدا عارف شەكوری، موزیسیان و بەڕێوەبەری كارە هونەرییەكانی موعین، روونكردنەوەیەكی دا و رایگەیاند، ئاگادارن ریكلام كراوە بۆ كۆنستێرتی موعین لە هەولێر، بەڵام ئەمە راست نییە و هیچ بەرنامە و پلانێكیان نییە كۆنسێرت لە هەولێر بكەن.

عارف دەڵێت، ئەگەر بەرنامە و پلانی كۆنسێرت بۆ موعین لە هەولێر یان هەر شوێنێكی دیكە هەبێت، لە پەیجە فەرمییەكانی هونەرمەند لە سۆشیال میدیا و میدیا فەرمییەكان بڵاودەكرێتەوە.

ئاماژەی بەوەش دا بە هیوان لە هەولێر كۆنستێرت بكەن و ئەو دەرفەتە بڕەخسێت، بەڵام حاڵی حازر هیچ لە ئارادا نییە.

موعین ئەسفەهانی، یەكێكە لە ناودارترین هونەرمەندانی فارس و لە ئەمریكا نیشتەجێیە و لە كوردستانیش زۆر ناسراوە و هەواداری زۆرە، تا ئێستاش دوو كۆنسێرتی لە هەولێر لە و سلێمانی لە ساڵانی رابردوو كردووە.