وەزیری ئاوەدانکردنەوە رێگایەکی ستراتیژی لە هەڵەبجە کردەوە

964+

ئەمەل ناجی- هەڵەبجە

رێگای ملەی گەچێنە بە گوژمەی 613 ملیۆن دینار لە هەڵەبجە کرایەوە، وەزیری ئاوەدانکردنەوە رایگەیاند، بۆ بەسەرکردنەوەی چەند پڕۆژەیەکی دیکەش هاتوون، لە کاتێکدا پارێزگاری هەڵەبجە دەرفەتەکەی قۆستەوە و داواکاریی نوێی بۆ پڕۆژەی زیاتر خستەڕوو.

بۆ کردنەوەی پرۆژەی رێگەی ملەی گەچێنە و بەسەرکردنەوەی پردی تەنگی سەید محەمەد دانا عەبدولکەریم وەزیری ئاوەدانکردنەوەی حکومەتی هەرێم، سەردانی هەڵەبجەی کرد و بە یاوەری نوخشە ناسیح پارێزگاری هەڵەبجە، چەند پرۆژەیەکیان بەسەرکردەوە و رێگەی ملەی گەچێنەشیان کردەوە کە تازە درووستکراوە.

دانا عەبدولکەریم وەزیری ئاوەدانکردنەوەی حکومەتی هەرێم بە 964ـی وت:”ئەم رێگەیە بە درێژی حەوت هەزار و دوو سەد مەتر بە گوژمەی شەش سەد و 13 ملیۆن دینار درووستکراوە،  رێگەی چەند گوندێکی لەسەرە”.

نوخشە ناسیح پارێزگاری هەڵەبجەش بە 964ـی وت:”چەند داواکارییەکمان پێشکەش بە وەزیر کرد تایبەت بە رێگەوبان، چونکە بەهۆی ئەو سنوورە جوگرافیە فراوانەی هەڵەبجەوە پێویستمان بە رێگەی زیاترە بۆ گوندەکان، و چەند داواکارییەکیشمان هەبووە لە ئەنجومەنی وەزیران کە جێبەجێنەکراوە، و ئەویش بەڵێنی پشتیوانی داوە بۆ داواکارییەکانمان”.

پێداچوونەوە: باری ساڵح