"شۆفێری ئۆتۆمبێلەکە هەڵاتووە"
لە خورماتوو هاوڵاتییەک ئۆتۆمبێل لێیدا و گیانی لەدەستدا
964+
سیروان خورشید – دوزخورماتوو
هاوڵاتییەکی خورماتوو لە رێگای چوون بۆ سەر کارەکەی ئۆتۆمبێل لێیدا و گیانی لەدەستدا، شۆفێری ئۆتۆمبێلەکەش لەسەری نەگەڕایەوە و هەڵات.
عەلی فەلاح، بەرپرسی بەشی فریاکەوتنی نەخۆشخانەی گشتی خورماتوو بە 964ـی وت، گەنجێکی تەمەن 30 ساڵ لە یەکێک لە کارگەکانی سنوورەکە کاریکردووە، رۆژانە بە پاسکیلەکەی دەچێتە سەرکار و ئەمڕۆش وەکو رۆژانی تر بەڕێکەوتووە بۆ سەر کارەکەی، لە نزیک پڕۆژەی نیشتەجێبونی ئاڵتون ستی ویستوویەتی لە شەقامەکە بپەڕێتەوە، لەو کاتەدا ئۆتۆمبێلێک لێیداوە و دەستبەجێ گیانی لەدەستداوە.
وتیشی، شۆفێری ئەو ئۆتۆمبێلەی لە گەنجەکەی داوە، نەوەستاوە و هەڵهاتووە، تەرمی گەنجەکەش بۆ تۆێکاری رەوانەی پزیشکی دادی کەرکوک کراوە.
عەلی فەلاح ئاشکراشیکرد، ئەو گەنجە ناوی محەمەد ئەحمەدە و دانیشتووی گەڕەکی کۆماری قەزای خورماتووە.
درەنگانی شەوی رابردووش لە گەڕەکی رزگاری خورماتوو، هاوڵاتییەکی دیکە ئۆتۆمبێل لێیدا و بە سەختی برینداربوو.
پێداچوونەوە؛ شۆڕش قادری
لە دوو رووداوی هاتوچۆودا دوو کەس گیانیان لەدەستدا و چواری دیکەش برینداربوون
