میوە زەرەرمەندى سەرەکییە
تەرزەى بەهار و وشکەساڵى هاوین باڵەکایەتى بێ بەرهەم کرد
964+
ئاکام غەفور-سۆران
لە بەهار تەرزە و لە هاوین بێ ئاوی و گەرما و وشکەساڵی گورزێکی گەورەی لە جوتیارانی باڵەکایەتی داوە، بەشێوەیەک هەرچی بەروبومی کشتوکاڵی سنوورەکەیە خەریکە لەناو دەچێت و دەبێتە ساڵێکى بێ بەرهەم بۆ جوتیاران.
ساڵانە باڵەکایەتی خاوەنی بەرهەمێکی باشی، (ترێ، گوێز ، خۆخ، قەیسی، چواڵا، سماق، هەنار، هەرمێ، هەنجیر و هەڵوژە)یە.
ئەیوب رەشدوری، جوتیارێکی دیاری باڵەکایەتیە و بۆ 964 وتی،”بەگشتی هەموو بەرووبومێک کەمیکردوە، هەرچی بەری دارەکانە لەگەڵ سەرما و گەرما هەڵوەرا و نەما،30 ساڵە کەشوهەوا و بەرهەمی جوتیاران بەم شيوەیە خراپ نەبووە”.
وەک باسی دەکات، جگە لەوەی ئەمساڵ بێ بەرهەمن، کاریگەری بۆ ساڵانی داهاتووش دەبێت لەسەر دار و بەرهەمەکەشی.
بەپێی ئاماری بەڕێوەبەرایەتی گشتی کشتوکاڵی سۆران، ساڵی رابردوو بەرهەمی گوێز لە سنورەکە نزیکەی دوو هەزار تۆن بووە، هەرچی ترێیە نزیکەی 750 تۆن بەرهەمی بووە، خۆخ و قەیسیش نزیکەی 800 تۆن بووە.
پێداچوونەوە: وریا فەتاح
