کارمەندە دانەمەزراوەکان دەنێرنە بەسرە و پارێزگاکانی دیکە
سلێمانی دەبێت بە فریادڕەسی کەرتی تەندروستیی عێراق
964+
دیلان محەمەد جەزا – سلێمانی
کارمەند و پەرستار و پزیشکێکی زۆری دانەمەزراو هەیە لە سلێمانی و ئێستا نەخۆشخانەکانی عێراق پێویستیان بەوانەیە و دەیانێرنە ئەوێ، بە تایبەت بەسرە، ئەمەش بە ویستی خۆیان و بە موچە و خزمەتی باشەوە.
هاوژین عوسمان سەرۆکی سەندیکای کارمەندانی تەندروستیی لقی سلێمانی بۆ 964 وتی، ئێستا نەخۆشخانەیەکی تایبەت لە بەسرە دروست دەکرێت و زۆر گەورەیە، بۆیە داوایان لە سلێمانی کردووە کارمەندی تەندروستیان بۆ بنێرن تا 200 کەس.
وتیشی، ئەمە هەلێکی باشە بۆ دانەمەزراوانی ئەو کەرتە بچنە ئەو پارێزگایانەی دیکەی عێراق و بە موچەی باش و شوێنی مانەوە و هاتوچۆکردن خزمەت دەکرێن.
ئەوان پلانیان هەیە نەک بۆ عێراق بگرە بۆ نەخۆشخانەکانی ئەوروپا و بەریتانیاش کارمەندی تەندروستی بنێرن و هەر چاوەرێی دەستی حکومەت نەکەن، کە دایانبمەزرێنێت.
ئێستا ئەو کەسانەی خوازیارن بڕۆنە بەسرە دەتوانن سیڤیەکانیان ببنە سەندیکای کارمەندانی تەندروستیی لقی سلێمانی.
پێداجوونەوە: توانا نەقی
