وەک دەڵێن سەری كەچەڵ دەسوتێنێت
پلەكانی گەرما لە باشووری عێراق دەتوانیت هێلكەی پێ ببرژێنیت
964+
محەمەد فاتیح
پلەكانی گەرما لە باشووری عێراق لەبەرزبوونەوەدایە و پێشبینی دەكرێت لە ماوەی چەند رۆژی داهاتوودا بگاتە ئاستی نیوەی كوڵان.
بەو پێیەبێت وەك دەوترێت سەری كەچەڵ دەسووتێنێت و زۆر بە ئاسانی دەتوانیت هێلكەی پێ ببرژێنیت.
دەستەی كەشناسیی عێراق هۆشداری دا لەوەی لە چەند رۆژی داهاتوودا، پلەكانی گەرما بەشێوەیەكی بەرچاو لە شارەكانی باشووری وڵات بەرز دەبنەوە و دەگەنە ئاستی نیوەی كوڵان.
ئەم گەرمایە پاڵی بە حكومەتی عێراقییەوە نا، كە دەوامی فەرمانگەكان لە كاتژمێریەكەوە بۆ دوو كاتژمێر كەمبكاتەوە.
رێنماییەكان لە كاتی بەرزبوونەوەی پلەی گەرما:
-هەوڵ بدەن نەچنە دەرەوە و تا پێیان بكرێت لە ماڵەوە بمێنن، تاكو كاتژمێر چواری سەرلەئێوارە.
– لە كاتی چوونە دەرەوەش هەوڵبدەن جلوبەرگی تەنك و رەنگی كاڵ و كراوە لەبەر بكەن، لەگەڵ كڵاوی فراوان یاخود چەتر بەكاربهێنن و چاویلكەش لەچاو بكەن.
– دوور بكەونەوە لە رێكردن لەبەر هەتاو و هەوڵبدەن زیاتر لە شوێنی سێبەردا رێ بكەن.
– بەهیچ شێوەیەك لەبەر تیشكی خۆر مەلەوانی و وەرزش ئەنجام مەدەن.
– بەردەوام ئاو و شلەمەنی بخۆنەوە بە رێژەی 3 لیتر لە رۆژێكدا، لەگەڵ خواردنی میوە و سەوزەوات بۆ ئەوەی جەستە بەردەوام تەڕ و شێدار بێت.
