ئەگەر تائێستا نەتزانیوە کێشەی موچەی حەشدی شەعبی چییە، ئەوە وەڵامەکە لێرەیە

+964

ژووری هەواڵ

پێدەچێت هەویری کێشەکانی حەشدی شەعبی ئاو زۆر بکێشێت، ئەم مانگە موچەی حەشد دواکەوت و سەرئێشەی زۆری هاتە پێش، هیچ گەرەنتیش نییە مانگەکانی داهاتوو ئەم کێشانە دووبارە نابنەوە.
پێش چەند هەفتەیەک رۆژنامەی وۆڵ ستریت جۆرناڵی ئەمریکی دەستی تۆمەتی بۆ کۆمپانیای (کی کارد) راکێشابوو بەوەی موچەی 200 هەزار ئەندامی سەر بە میلیشیاکان لای ئەو دابەش دەکرێت، هەر دوای ئەوە قەیرانی راگیرانی موچەی حەشدی شەعبی سەریهەڵدا.
ئەمە بەس بوو بۆ ئەوەی کی کارد گرێبەستی دابەشکردنی موچەی حەشدی شەعبی نوێ نەکاتەوە، بە دوای ئەویشدا بانکی رافیدەینی حکومی  وتی ئاگرە سوورە لە خۆم بە دوورەو ئەویش خۆی لە دابەشکردنی موچەکان دوور خستەوە، بەناچاری دەستەی حەشدی شەعبی پەنای برد بۆ بانکی (نەهرەین) کە ئەمەشیان بانکێکی حکومییە.
هەرچەندە دەستەی حەشدی شەعبی باسی ئەوە دەکات کە ئەمە کێشەیەکی تەکنیکییەو پەیوەستە بە مانگی حوزەیرانەوە، بەڵام ئاماژەکان وا دەریناخەن گرفتەکە بە ئاسانی کۆتایی بێت، کێشەو ئاڵنگارییەکان لەوانە قوڵترن.
یەکێک لە کێشە هەرە دیارەکان لەبەردەم حەشدی شەعبیدا ئەوەیە کە جیاوازییەکی زۆر هەیە لە نێوان موچەی حەشدو موچەی فەرمانبەرانی دەوڵەت، چەکدارانی حەشد نە یاسای راژە دەیانگرێتەوە نە خانەنشینی، بۆیە بە ئاسانی سیستەمی موچەی حەشد لەگەڵ موچەی موچەخۆرانی دیکەدا تێکەڵ ناکرێتەوە.
هەر ئەوە نییە، بەڵکو دەستەی حەشدی شەعبی بەبیانووی ئەمنی داتای تەواوی چەکدارەکانی ئاشکرا ناکات، ئەمەش گومان لەسەر ئەو دەستەیە دروست دەکات ئاخۆ هەموو ئەوانەی موچە وەردەگرن حەشدی راستەقینەن یان بندیواریان هەیە.
زۆربەی زۆری بەرپرسانی حەشدی شەعبی خۆیان دەپارێزن لەوەی لەسەر ئەم بابەتە قسە بکەن، بەڵام مەیسەم زەیدی فەرماندەی فیرقەی عەباس لۆمەی دەستەی حەشدی شەعبی دەکات، فیرقەی عەباس سەر بە مەرجەعی باڵای شیعە سیستانییەو زۆر دانووی لەگەڵ هێزەکانی دیکەی حەشدی شەعبیدا ناکوڵێت.
زەیدی بە روون و رەوانی وتی: ئەم مەسەلەیە پەیوەستە بە سزاکانی ئەمریکاوە، هەر بانک و کۆمپانیایەک موچەی حەشد دابەش بکات سزا دەدرێت، ئەو دەڵێت ”چارەسەر ئەوەیە موچەی حەشدی شەعبی بە کاش بدرێت”. بەڵام ئەوانەی لە بواری داراییدا شارەزان دەڵێن خۆ ئەگەر ئەوەش بکرێت، دوور نییە ئینجا سزاکەی ئەمریکا بکەوێتە سەر وەزارەتی دارایی و حکومەتی عێراقی.
زۆربەی ئەو پسپۆڕە داراییانەی 964 لە بەغدا قسەی لەگەڵ کردن کۆکن لەسەر ئەوەی هەتا ئەو کاتەی سیستەمی بانکی عێراق لە ژێر سایەی دەسەڵاتی ئەمریکادا بێت ئاسان نییە کێشەی موچەی حەشدو میلیشیاکان چارەسەر ببێت.
ئێستا چارەسەر هەر ئەوەیە سودانی و گەورە بەرپرسانی عێراق بچنە واشنتن و ترەمپ قایل بکەن کە کێشە بۆ موچەی حەشدی شەعبی دروست نەکات، بەڵام لەو بارەدا دەبێت حەشدیش خۆی یەکلایی بکاتەوە، چونکە خۆ ناکرێت عێراق هاوپەیمانی ئەمریکا بێت، بەڵام هەموو رۆژ سەرکردەکانی حەشدی شەعبی هەڕەشە لە ئەمریکا بکەن.