شێخ دەیکڕێت بۆ جوانى
دوکاندارێک: چەقۆ بە گەنج و مەنج نافرۆشم
964+
دیلان محەمەدجەزا- سلێمانى
دوکاندارێکى فرۆشتنى چەقۆ و شمشێر لە سلێمانى باس لەوەدەکات، زۆرینەى ئەوانەى چەقۆ دەکڕن خاوەن چێشتخانەکانن، دەشڵێت: ژمارەیەک کەس بۆ جوانى دەیکڕن.
چەقۆ نافرۆشم بە گەنج و مەنج
دیلمان محەمەد غەفور، دوکاندارێکى سلێمانییە و جۆرەکانى چەقۆ و شمشێر دەفرۆشێت، لەبارەى کارەکەیەوە بۆ 964 قسەى کردووە و دەڵێت: دوو ساڵە خواست لەسەر کڕینى چەقۆ کەمبووەتەوە و زیاتر چێشتخانە و ماڵەکان دەیکڕن.
ئەو کە زۆرینەى جۆرەکانى چەقۆ لە دوکانەکەیدا هەیە، ئاشکراى دەکات کە چەقۆى هەیە دەگاتە نزیکەى دوو هەزار دۆلار (20 وەرەقە).
“چەقۆ بە هەموو کەس نافرۆشم و نایدەم بە گەنج و مەنج، سەیرى دەموچاوى دەکەم و خەبیرم تێیدا، ئەگەر زانیم بۆ بابەتێکى دروست بەکارى ناهێنێت پێى نافرۆشم”، ئەو دوکاندارە وادەڵێت.
باسى لەوەش کرد، شمشێر و خەنجەر لە دوکانەکەیدا دەستدەکەوێت کە زیاتر شێخ و موریدەکان دەیکڕن و بۆ جوانى بەکارى دەهێنن.
پێداچوونەوە: وریا فەتاح
