خۆڵبارین لە هەولێر و سلێمانی 60 کەسی ناردووەتە نەخۆشخانە

964+

ژووری هەواڵ

لە هەرێمی کوردستان و پارێزگای کەرکوک، خۆڵبارین نزیکەی 170 کەسی ناردە نەخۆشخانە، بەشێکی زۆریان چارەسەری پزیشکیان بۆ کراوە و نێردراونەتەوە ماڵەوە.

بەگوێری ئاماری بەڕێوەبەرایەتییەکانی تەندروستی ژمارەی ئەو کەسانەی کە خۆڵبارین کێشەی بۆ دروستکردوون بەم جۆرەیە:

سلێمانی: 30 کەس

هەولێر: زیاتر لە 30 کەس

کەرکوک: 109 کەس

لە هەڵەبجە و دهۆک  خۆڵبارین کێشەی بۆ هیچ کەسێک دروستنەکردووە.

دوو رۆژە شەپۆلێکی خۆڵبارین باڵی بەسەر ناوچەکانی کوردستاندا کێشاوە و بەپێی پێشبینییەکانی کەشناسی، سبەینێش کاریگەری شەپۆلەکە دەمێنێتەوە بەڵام بە لاوازی.

لەگەڵ ئەو شەپۆلە خۆڵبارینەدا، بەڕێوبەرایەتیی گشتیی تەندروستیی سلێمانی چەندین رێنمایی بڵاوكردووەتەوە و داوا لە هاوڵاتیان دەكات نەچنە دەرەوە.

بەڕێوبەرایەتییەكە بڵاویكردەوە بۆ چۆنیەتیی خۆپاراستن لە کاتی خۆڵبارین، دەبێت لەکاتی چوونەدەرەوەدا ماسک بەکاربهێنن و زوو زوو بیگۆڕن و وا باشترە لە ماڵەوە بمێننەوە و نەچنە دەرەوە.

داواش دەكات بەپێی رێنماییەكان پێویستە چاویلکە و قەترەی چاو بەکاربهێنين بۆ پاراستنی چاوەکانمان و چاوەکانمان بشۆين لەبری خوراندنی.

دەشڵێت، “بە باشی دەرگا و پەنجەرەی ماڵەکەت دابخە و لەکاتی خۆڵباریندا لە پلەی گەرمی بەرزدا برێکی باش ئاو بخۆرەوە و لە کاتی شۆفێریدا جامەکانی ئۆتۆمبێلەکەت دابخە”.

“ئەوانەی نەخۆشیی رەبۆیان هەیە بە بەردەوامی پەمپی ئۆکسجین هەڵبگرن و لە ژێر رێنمایی پزیشکیدا چارەسەر وەربگرن”.

لە سنووری سلێمانی خۆڵبارین نزیکەی 30 کەسی ناردە نەخۆشخانە