پەیامنێری 964 لە شوێنی ئاگرەكەیە
“هیچ درۆن و مووشەکێک لە بەحركە نەكەوتوونەتە خوارەوە”
964+
عەبدولعەزیز خالند – بەحركە
پەیامنێری 964 ئەمشەو خۆی گەیاندە قەزای بەحركە و دوای گەڕان و سووڕانێكی زۆر و قسەكردن لەگەڵ شایەدحاڵەكان، دەركەوتووە هیچ درۆنێك لە بەحركە نەكەوتووە.
ئەمشەو وابڵاوكرایەوە درۆنێك لە قەزای بەحركە كەوتووەتە خوارەوە و ئاگریش كەوتووەتەوە، بەڵام پەیامنێری 964 چووە شوێنی ئاگرەكە و چەند شایەدحاڵێك دووپاتیان كردەوە، كە لە ئێوارەوە لەو شوێنەن، كە دەكەوێتە پشت كەمپی ئیماراتی و نە درۆنیان بینیوە و نە دەنگی هیچ تەقینەوەیەكیان گوێ لێبووە.
هەروەها بە پێی بەدواداچوونی 964، ئەو ئاگرەی كە دەبینرێت، شوێنی كۆكردنەوە و سووتاندانی زبڵ و خاشاكە.
هاوكات دەزگای دژەتیرۆری كوردستان لە راگەیاندراوێكدا ئەمشەو پشتڕاستی كردەوە، هیچ درۆن و مووشەكێك لە بەحركە نەكەتوون و شار ئارامە.
پێداچوونەوە: ئەرسەلان عەبدوڵا
