ئاگریش كەوتەوە
پاشماوەی درۆن و مووشەك لە سنووری پردێ كەوتەوە
964+
عەبدولعەزیز خالند – پردێ
ئەمشەو دووشەممە دەوروبەری كاتژمێر 10:30 پاشماوەی درۆن یان مووشەك كەوتووەتە زەوییەكانی گوندەكانی یارمجە و بیبانی لە سنووری ناحیەی پردێ، بەشێكیان بووەتە هۆی ئاگركەوتنەوە.
بەپێی قسەی شایەتحاڵەكانی سنوورەكە بۆ 964، پێدەچێت ئەو پارچانەی كەوتبن، درۆن یان پارچەی مووشەك بن، هاوكات دوو لەو پارچانە دۆزراونەتەوە و بوونەتە هۆی ئاگركەوتنەوە، پارچەكیشیان تا ئامادەكردنی ئەم هەواڵە نەدۆزراوەتەوە.
پەیامنێری 964 لە پردێ زانیاریی ئەوەشی گەیاند، كە ئاگری ناو زەوییە كشتوكاڵییەكان لە لایەن هاوڵاتیانەوە كوژێندراوەتەوە و زیانی نەبووە، هەروەها تیمەكانی پۆلیسی پردێ و تیمی هەڵوەشاندنەوەی تەقەمەنی لە كەركوك، گەیشتوونەتە سنوورەكە و خەریكی چارەسەركردنی پارچە كەوتووەكانن، كە سێ پارچەن.
ئەم ماوەیە بەهۆی شەڕی ئیسرائیل و ئێران و كارابوونی سیستمی بەرگری هێزەكانی ئەمریكا لە هەرێمی كوردستان، درۆن و مووشەك و پارچەی مووشەك لێرەو لەوێ دەكەون، ئەوەی باشە تا ئێستا هیچ زیانێكی گیانییان نەبووە.
پێداچوونەوە: ئەرسەلان عەبدوڵا
