قایمقامی هەولێر: هەرچی ڤەپیە بە قاچاغ دێتە كوردستان

964+

ئەرسەلان عەبدوڵا

لە هەولێر زیاتر لە هەشت هەزار دانە ڤەیپ و جگەرەی ئەلیكترۆنی لەناوبران، قایمقامی هەولێریش دەڵێت، هێنانی ڤەیپ قەدەغەیە و ئەوەی دێتە بازاڕەكانی كوردستانیش بە قاچاغ دێت.

ئەمڕۆ دووشەممە 2.6.2025 لە لایەن لیژنەكانی سەر بە قایمقامیەتی قەزای ناوەندیی هەولێر، زیاتر لە هەشت هەزار دانە ڤەیپ و جگەرەی ئەلیكترۆنی لەناوبران.

نەبەز عەبدولحەمید قایمقامی هەولێر بە 964ی راگەیاند، ماوەیەكە بڕیار دەرچووە و هێنان و فرۆشتنی ڤەیپ و جگەرەی ئەلیكترۆنی قەدەغەیە، بەڵام ئەوەی لە بازاڕەكاندا هەیە، هەمووی بە قاچاغ دێت.

وتیشی، لە ماوەی رابردوودا زیاتر لە 50 هەزار دانە ڤەیپ و جگەرەی ئەلیكترۆنی لە لایەن لیژنەكانیانەوە دەستی بەسەردا گیراوە.

قایمقام وتی، هەر دوكان و بازاڕێك ڤەیپ بفرۆشێت، دادەخرێت و غەرامەش دەكرێت، بەردەوامیش دەبن لە هەڵمەتی گەڕان و پشكنین بۆ دەستبەسەداگرتنی ڤەیپ و جگەرەی ئەلیكترۆنی، كە زیانێكی زۆری تەندروستی هەیە.

لە دوکانێکی بازاڕى سۆران 438 ڤەیپ دەستی بەسەرداگیرا