شوێنی وەستانی تاكسی و پاسەکانی پیرەمەگروون – سلێمانی کرا بەیەک

ئەحمەد محەمەد – سلێمانی

مانگێك دەبێت، تاكسییەكانی هێڵی گواستنەوەی پیرەمەگروون – سلێمانی گرفتیان لەگەڵ بەڕێوەبەرایەتی ناحیەكە هەیە لەسەر شوێنی كاركردنیان و بەڕێوەبەری ناحیەكەش دەڵێت، بڕیارەكە لە چوارچێوەی رێكخستنەوەی ناو بازاڕی ناحیەكە دراوە و کێشەکەشیان چارەسەر کراوە.

بڕیارەكە لەسەر داواكاری خەڵكی پیرەمەگروون بووە کە داوایانکردووە شوێنی وەستانی تاکسی و پاسەکان بکڕێ بەیەک، بۆئەوەی لۆد و قەرەباڵغی ناو بازاڕ كەمبكرێتەوە.

دابان كەمال نوێنەری شۆفێرانی هێڵی گواستنەوەی پیرەمەگروون – سلێمانی بە 964ـی وت، “ئێمە خۆمان 130 تاكسی هێڵی گواستنەوەین و لە شوێنەكە جێگامان نابێتەوە، بڕیارێك درابوو كە شوێنی وەستانی تاكسییەكانمان بەش بكرێت لەگەڵ پاسەكانی هێڵی پیرەمەگروون – سلێمانی كە ئەوانیش 45 پاسن، بەڵام ناڕازیبووین لە بڕیارەكە و ئەمڕۆ یەكشەممە، لەگەڵ بەڕێوەبەری ناحیە كۆبوینەوە بۆ چارەسەركردنی گرفتەكەمان”.

سەبارەت بەو بابەتە پەیوەندیمان کرد بە بەكر عەبدولكەریم، بەڕێوەبەری ناحیەی پیرەمەگروون، ئەو وتی، “لە یەک مانگی رابردوودا، لەسەر داواكاری دانیشتووانی پیرەمەگروون و مامۆستایانی ئایینی، هەستاین بەرێكخستنەوەی ناو بازاڕ، شوێنی تاكسی و پاسەكانمان كرد بەیەك و لەهەمان شوێن جێگامان بۆ هێڵی پاسەكانیش كردەوە، بەمەبەستی لابردنی زیادەڕۆیی و پەرتەوازەیی ناوبازاڕ”.

“گرفتی شۆفێر تاكسییەكان ئەوەبوو شوێنەكەیان بەرتەسك دەبێتەوە و ژمارەیان زۆرە، هاتن بۆ لامان و گوێمان لێگرتن، كە زانیمان داواكارییەكەیان رەوایە و شوێنەكەیان بچوك دەبێتەوە، بەشی تاكسییەكانمان زیاتر كرد و شوێنەكەمان بۆ فراوان كردن و گرفتەكەش چارەسەر كرا”، بەڕێوەبەری ناحیەی پیرەمەگروون وای وت.

پێداچوونەوە؛ شۆڕش قادری