پاشماوەى جەنگ
لە پێنجوێن حەوت کرێکار بەهۆى تەقینەوەى پاشماوەى جەنگى بریندار بوون
964+
کامیار کەمال- پێنجوێن
جەنگەکە ساڵانێکە کۆتایى هاتووە و ئێستا هەردوو وڵات دۆستى گیانى بەگیانى یەکترین، بەڵام بۆ خەڵکى هەرێمى کوردستان تائێستاش قوڕبەسەرى دێنێت، ئەوەتا بەیانى ئەمڕۆ، بەهۆى تەقینەوەى پاشماوەیەکى جەنگى عێراق و ئێران، حەوت کرێکار لەسەر زەوییەکى کشتوکاڵى پێنجوێن بریندار بوون.
مقەدەم کاروان عەبدوڵا، ئەفسەرى پۆلیس لە بنکەى پێنجوێن بە 964ـى وت،” رووداوەکە بەیانى ئەمڕۆ هەینى، لە کاتژمێر 7:30 خولەک روویداوە، ئەوەش دواى ئەوەى کرێکاران ودواى کارکردن ویستویانە پشوویەک وەربگرن”.
وەک ئەوەى کرێکارەکان بۆ ئەو ئەفسەرەى پۆلیس قسەیان کردووە، نەیانزانیوە ئەو پاشماوەیە چى بووە، تەنیا پارچە ئاسنێکى خڕ بووە و دەستکاریان کردووەو پیایاندا تەقیوەتەوە.
ئەو ئەفسەرە باسى لەوەشکرد، دۆخى بریندارەکان مەترسیدار نین، بەڵام سێ لە بریندارەکان برینیان قوڵە و دەبێت رەوانەى سلێمانى بکرێن، چونکە پارچە گەیشتووەتە سەر ئێسکیان.
کرێکارەکان دانیشتووى قەزاى سەیدسادقن و بۆ کار روویان لە پێنجوێن کردووە.
رووداوەکە لە دەشتى کێلو لە سنوورى پێنجوێن روویدا کە ئەو شوێنە پێشتر مەیدانى شەڕى عێراق و ئێران بووە و تائێستاش پاشماوەى ئەو شەڕە لەو شوێنە ماون.
ئەو رووداوانە جارى یەکەم نین و پێش دووساڵیشن پاشماوەیەکى جەنگى بە شۆفێرێکى تراکتۆردا تەقیەوە و گیانى لەدەستدا.
پێداچوونەوە: وریا فەتاح
