رۆبیۆ بۆ بارزانی؛ هەماهەنگیمان هۆکارە بۆ سەقامگیریی لە عێراق

ئەحمەد مستەفا

وەزیری دەرەوەی ئەمریکا، جگە لەوەی پەیوەندییە تەلەفۆنییەکەی لەگەڵ نێچیرڤان بارزانی بە بەرهەمدار ناوبردووە، لە تۆڕی ئێکس وتویەتی، هەماهەنگی ئەمریکا و هەرێمی کوردستانی عێراق دەبێتە هۆکاری سەقامگیریی.

رۆژی چوارشه‌ممه‌، 28.5.2025، سەرۆکایەتی هەرێمی کوردستان پەیوەندی تەلەفۆنی، نێچيرڤان بارزانی، سه‌رۆكى هه‌رێمى كوردستان و مارکۆ روبیۆ، وەزیری دەرەوەی ئەمریکای ئاشکراکرد و رۆبیۆ پاشتر پۆستێکی بڵاوکردەوە.

‎مارکۆ روبیۆ، وەزیری دەرەوەی ئەمریکا لە ئێکس نوسیوویەتی، “پەیوەندییەکی تەلەفۆنیی بەرهەمدارم لەگەڵ سەرۆکی هەرێمی کوردستانی عێراق، سەرۆک نێچیرڤان بارزانی هەبوو”.

وەزیری دەرەوەی ئەمریکا دەڵی، “هەماهەنگیی نێوان ئەمریکا و هەرێمی کوردستانی عێراق دەبێتە هۆکاری سەقامگیری لە عێراق و ناوچەکەش بەگشتی. هاوبەشی گرنگ لەگەڵ کۆمپانیاکانی ئەمریکا سوود بە گەلانی عێراق و ئەمریکاش دەگەیێنێت”.

سەرۆکایەتی هەرێم نوسی بووی، له‌ په‌يوه‌ندييه‌كه‌دا هه‌ردوولا جەختیان له‌ بره‌ودان به‌ پەیوەنديی ستراتیژيی ئەمریکا و هەرێمی کوردستان کردەوە، هەروەها باسيان له‌ هاريكاريى بوارى ئابوورى و وزه‌ و گرنگيی بەردەوامبوونی هەماهەنگیى نێوانيان کرد بۆ پشتگيريى سەقامگیری و ئارامى لە عێراق، سووریا و ناوچەکە به‌گشتی.

وه‌زيرى ده‌ره‌وه‌ى ئه‌مريكا سوپاسی سەرۆک نێچيرڤان بارزانی کردووە بۆ رۆڵ و هەوڵەکانی لە چارەسەرکردنی کێشەكانى نێوان حکومەتی عێراقى فيدراڵ و حکومەتی هەرێمی کوردستان لە رێگەی لێكگه‌یشتن و گفتوگۆی بنیاتنەرانه‌وە.