پارێزگارەکانی هەرێمی کوردستان گەیشتنە سنە - وێنە: پارێزگای سلێمانی
پێشوازییەکی گەرموگوڕیان لێکرا
پارێزگارەکانی هەرێمی کوردستان گەیشتنە سنە
964+
شۆڕش قادری
پارێزگارەکانی هەرێمی کوردستان گەیشتنە سنە و لەلایەن پارێزگار و خەڵکی شارەکەوە پێشوازییەکی گەرموگوڕیان لێکرا.
وەک ئەوەی هەڤاڵ ئەبوبەکر پارێزگاری سلێمانی لە پەڕەی تایبەتی خۆی لە تۆڕی کۆمەڵایەتی فەیسبووک نووسیویەتی، ئەمڕۆ، لە فڕۆکەخانەی نێودەوڵەتیی هەولێرەوە و بە بەشداریی سەرۆکی ژوورە بازرگانیی و پیشەسازییەکانی سلێمانی و هەولێر و دهۆک و هەڵەبجە و بەڕێوەبەری دەروازە هاوسنورییەکان بەرەو پارێزگای سنە لە رۆژهەڵاتی کوردستان بەڕێکەوتوون.
ئاماژەی بەوەشکردووە، لە فڕۆکەخانەی سنە، لەلایەن ئارش لەهۆنی پارێزگاری سنە و گەورە بەرپرسانی وەزارەتی دەرەوە و خەڵکی شارەکەوە، پێشوازییەکی شایستەیان لێکراوە.
پارێزگارەکانی هەرێمی کوردستان بۆ کۆبوونەوەی ساڵانەی پارێزگا هاوسنورییەکانی هەرێم و رۆژهەڵاتی کوردستان چوونەتە سنە و سێ رۆژ لەوێ دەبن، پێشتر هەڤاڵ ئەبوبەکر بە 964ـی وتبوو، گفتوگۆ لەسەر پەیوەندییە کەلتووری و کۆمەڵایەتی و ئابووری و بازرگانی و زانستییەکان دەکەن.
