راژەی مامۆستایانی بەشی کوردیی کەرکوک نەگوازراوەتەوە سەر بەغدا

هاوبەش ئەبوبەکر

ماوەی زیاتر لە مانگێکە بڕیاری گواستنەوەی راژەی مامۆستایان لە ناوچەکانی دەرەوەی ئیدارەی هەرێمی کوردستان بۆسەر بەغدا دەرچووە، بەڵام هێشتا جێبەجێنەکراوە.

تۆڕی 964 زانیویەتی، وەزارەتەکانی پەروەردەی عێراق و هەرێم لە ئاستی باڵادا کۆبوونەتەوە و چەند لیژنەیەکی پەیوەندیدار دروستکراون و ئاماری ژمارەی مامۆستایان و فەرمانبەرانیان وەرگرتووە.

لیژنەکان ناوی 17 هەزار مامۆستا و فەرمانبەری بەشی کوردییان لە موسڵ، خانەقین، کەرکوک و دووزخورماتوو تۆمارکردووە، کە ئەوە دەیانگرێتەوە راژە، موچە و نەسرییەی مانگانەیان بخرێتە سەر حکومەتی عێراق.

مانگی رابردوو وەزارەتی پەروەردەی هەرێم رایگەیاند، تەنیا لە کەرکوک هەشت هەزار مامۆستا و فەرمانبەر لە بڕیارەکە سوودمەند دەبن .

تەنیا بۆ موچەی مانگانە، بەشی کوردی کەرکوک بڕی شەش ملیار و 500 هەزار دیناری پێویستە، كە ساڵانە دەكاتە 78 ملیار دینار و بۆ نەسرییەش مانگانە پێنج ملیۆن دیناریان پێویستە.