هاوینێكی گەرم و پڕوكێنەر بەڕێوەیە
شارەزایەكی كەشناسی بە دووری نازانێت خۆڵبارین هەرێمیش بگرێتەوە
964+
محەمەد فاتیح
ماوەیەكە گۆڕانكاری زۆر و لەپڕ بەسەر كەشوهەوای عێراقدا دێت و ناوبەناوە خۆڵبارین دەستپێدەكات و هەرێمی كوردستانیش دەگرێتەوە و لە ئێستاشدا شەپۆلێكی خۆڵبارین عێراقی گرتووەتەوە، بە قسەی شارەزاییەكی كەشناسییش، بۆی هەیە دووبارە بگاتەوە هەرێمی كوردستانیش.
سادق عەتییە، شارەزا لە بواری كەشناسی پێشبینی كرد ئەم خۆڵبارینە هەرێمی كوردستانیش بگرێتەوە و تایبەت بە 964ـی وت، هەموو شارەكانی عێراق و هەرێمی كوردستان ئێستا بە قۆناغی راگوزەردا تێپەڕدەبن، بە هۆی ئەوەی لە وەرزی زستانەوە دەچینە نێو وەرزی هاوینەوە و شەپۆڵی خۆڵبارین زیادی كردووە و ناوبەناوە دووبارە دەبێتەوە.
وتيشى، ئەمڕۆ پێنجشەممە وەك بینیمان زۆربەی ناوچەكانی رۆژئاوای عێراق كەوتە ژێر كاریگەریی خۆڵبارینەوە، چونكە كەشوهەوای بەهار زوو زوو گۆڕانكاری بەسەردا دێت و كتوپڕ دەبێت بە هۆی جێگیرنەبوونی سیستەمی هەوا، ئێستاش هەموو شارەكانی عێراق و هەروەها هەرێمی كوردستانیش ئەگەری خۆڵبارینیان لەسەرە.
فڕۆكەخانەی نێودەوڵەتیی بەغدا داخرا
“ئەوەی لە ئێستادا كاریگەری خستووەتە سەرمان نزمە پاڵەستۆیەكە كە لە باكووری ئەفریقاوە رووی كردووەتە عێراق ناسرواە بە نزمە پاڵەپەستۆی خووماسینی كە زۆر وشكە و كاتێكیش بە ناوچە وشكەكاندا تێپەڕ دەبێت دابەزینی پەستانی بەرگەهەوا دروست دەكات و دەبێته هۆی چالاكبوونی رەشەبا و دروستبوونی گۆڕانكاری گەورە لە كەش و هەوادا” سادق عەتیە واى وت.
پێشبینیشیكرد كاریگەری ئەم شەپۆلی خۆڵبارینە لەسەر عێراق تاكو رۆژی شەممە بەردەوام بێت، بەهەمان شێوە گۆڕانكاریەكانی بەهاریش بەردەوام دەبێت لەگەڵماندا و پلەكانی گەرماش بە جێگیری نامێنێتەوە و ئەم حاڵەتە لە ناوەڕاستی مانگی ئایار 30.5.2025 كۆتایی پێدێت و دوای ئەوە كەش و هەوا جێگیر دەبێت و دەكەوینە ناو هاوینێكی گەرم و پڕوكێنەرەوە.
