لە ناحیەی شۆڕش بڕێکی زۆر جگەری بەستوو دەستی بەسەرداگیرا - وێنە: قایمقامیەتی چەمچەماڵ
چەند شوێنکیش داخران
لە ناحیەی شۆڕش بڕێکی زۆر جگەری بەستوو دەستی بەسەرداگیرا
964+
شۆڕش قادری
دوای بڵاوبوونەوەی پەتای خوێنبەربوون لە چەند شوێنێکی کوردستان، لیژنەکانی تەندروستی و قایمقامیەتی چەمچەماڵ هەڵمەتەکانیان بۆ پشکنینی بازاڕ چڕ کردووتەوە و لە ناحیەی شۆڕش دەستیان بەسەر بڕێکی زۆر جگەری بەستوودا گرت و چەند شوێنێکیشیان داخست.
شەریف رەحیم جێگری بەڕێوەبەری گشتی تەندروستی چەمچەماڵ بە 964ـی وت، “لیژنەیەکی هاوبەشمان لەگەڵ قایمقامیەت و بەشی ئابووری ناحیەی شۆڕش هەیە کە لە 12 تیم پێکهاتووە و بەردەوام دوکان و شوێنە بازرگانییەکان بەسەردەکەنەوە”.
ئاماژەی بەوەشکرد، لە ناحیەی شۆڕش، سەردانی قەسابخانە و شوێنی سەربڕینی ئاژەڵ و مارکێت و گۆشتفرۆشانی سنوورەکەیان کردووە و لەو سەردانەدا ژمارەیەک شوێن بەبۆنەی نەبوونی مۆڵەت و پابەند نەبوونیان بە رێنماییە تەندروستییەکان داخران و بەشێکیشیان سزای دارایی کران و دەست بەسەر کەوپەلەکانیاندا گیرا.
شەریف رەحیم وتیشی، لەیەکێک لە مارکێتەکانی ناحیەی شۆڕش دەست گیراوە بەسەر بڕێکی زۆر جگەری مریشکی بەستووی قەدەغەکراو و بەپێی یاسا مامەڵە لەگەڵ ئەو شوێنە دەکرێت.
ئەوەش دوای ئەوە دێت کە چەند رۆژێکە نەخۆشی تای خوێنبەربوون لە کەرکوک و چەند شوێنێکی کوردستان بڵاوبووەتەوە و جێگری بەڕێوەبەری گشتی تەندروستی چەمچەماڵ وتی، بە ئامانجی پاراستنی تەندروستی هاوڵاتیان هەڵمەتەکانمان چڕ کردووەتەوە.
سێ دوکانی گۆشتفرۆشتن لە ناحیەی شۆڕش داخران
