لەلایەن سوپاى تورکیاوە
لە سێ رۆژدا؛ سنوورى ئامێدى 97 جار بۆردومانکراوە
964+
وریا فەتاح
تەنیا لەماوەى سێ رۆژى رابردوودا، سوپاى تورکیا 97 جار سنوورى ئامێدى و بەرى گارەى بۆردوومان کردووە کە 53 جاریان ئەمڕۆ بووە.
کامەران عوسمان، رێکخەرى تیمى کوردستانى رێکخراوىى CPTـى ئەمەریکى بە 964ـى وت،” ئەمڕۆ یەکشەممە، لە کاتژمێر 10:5 خولەکى بەیانى تا 11:20 خولەک، تۆپخانەکانی سوپای تورکیا، 53 جار گوندەکانی “مژێ، کەفنە مژێ، سپیندارێ و گرگاشێ”یان لە بەری گارە، لە سنوری قەزای ئامێدی، لە پارێزگای دهۆک تۆپباران کردووە”.
بەپێى داتاکانى ئەو رێکخراوە، رۆژى 18ـى ئەم مانگەش لە کاتژمێر کاتژمێر 2:15 خولەک تاوەکو 3:45 خولەکی دوانیوەڕۆ، تۆپخانەکانی سوپای تورکیا 27 جار تۆپبارانی گوندەکانی “سپیندارێ، گرگاشی، مژێ و کەفنە مژێ”ـی لە بەری گارە لە قەزای ئامێدی کردووە.
ئەوە جگە لەوەى شەوى رابردوو و دوێنێش، 17 جار، ناوچەکانى “گەلی مێوین” لە چیای مەتینا و ناوچەکانى دەورووبەرى بۆردومانکراون.
” هەفتەیەکە هێرش و بۆردوومانەکانی سوپای تورکیا بۆسەر چیای گارە و گوندەکانی دەووروبەری چڕبوونەتەوە، بەڵام هیچ هاووڵاتییەکی مەدەنی نەبوونەتە قوربانی”، کامەران عوسمان واى وت.
ئەو گوندانە لە چوارچێوەى ئۆپەراسیۆنەکانى ساڵى رابردووى سوپاى تورکیا، دانیشتوانەکە گوندەکانیان چۆڵکردووە، ئێستا خەڵک بە رێگەپێدانى حکومەتى هەرێم لە کاتژمێر 8 بۆ 4ـى ئێوارە بەمەبەستى کشتوکاڵکردن دەگەڕێتەوە.
CPT یاخود “تیمەکانی بنیاتنانی ئاشتی کۆمەڵگە” رێکخراوێکی ئەمریکییە و لە چەند وڵاتێکى جیهان تیمیان هەیە و لە بوارە جیاوازەکانى مافى مرۆڤدا کار دەکەن، تیمى کوردستانى رێکخراوە سەرنج و پڕۆژەکانیان لەسەر ئەو بۆردوومان و ئۆپەراسیۆنەکانەیە کە دەکرێتە سەر خاکى هەرێمى کوردستان لەلایەن تورکیا و ئێرانەوە.
