بەرگریی شارستانیی سلێمانی؛ شەپۆلە هێمنەکەی ئاو فریوتان نەدات

964+

ئەحمەد مستەفا

بەرگریی شارستانیی سلێمانی، لە زاری بەڕێوەبەرەکەیانەوە دەیانەوێت ئەو پەیامە بە خەڵک بگەیەنن، کەشی گەرما و رووکەشی هێمنی رووبار و چەمەکان نەبێتە هۆکاری فریودەری گەشتیاران و بۆ مەلەکردن ژیانیان بخەنە مەترسیییەوە.

ئەمڕۆ یەکشەممە 13.4.2025، ئەو بەڕێوەبەرایەتییە لە هەژماری خۆی، لە زاری دیار ئیبراهیم بڵاوی کردەوە، بەڕێوەبەرایەتییەکە لە سۆنگەی پەرۆشی قووڵی بۆ سەلامەتی گیانی خەڵک، بە ئەرکی سەرشانی خۆی دەزانێت، کە بە توندترین شێوە هۆشداری بدات سەبارەت بە مەلەکردن لە چەند شوێن و ناوچەیەک.

لەوانە؛

_ چەم و ڕووبارەکان: بەتایبەت ئەو ئاوانەی کە لێڵن، بنەکەیان نادیارە، یان خاوەنیشەپۆلی بەهێز و گەردەلوولی ژێر ئاون.

_ گۆم و بەستەرە ئاوییە وەستاوەکان: کە زۆرجار قوڵاییەکەیان نادیارە و زەلکاوی بنەوەیان دەبێتە هۆی گیانی لەدەستدان.

_ هەر شوێنێکی ئاویی دیکە کە بە فەرمی بۆ مەلەکردن دیاری نەکراوە و پێشینەی ڕووداوی خنکانی تێدا تۆمار کراوە.

کە بارەی سروشتی ئاوی ئەو ناوچانە، بەڕێوەبەری بەرگری شارستانی سلێمانی دەڵێت، مەلەکردن لەم جۆرە ئاوانەدا، جیهانێکی تەواو جیاوازە لە مەلەکردن لە مەلەوانگە پارێزراو و ستانداردەکاندا. تەنانەت ئەگەر خۆت بە مەلەوانێکی لێهاتووش بزانیت، سروشتی ئەم ئاوانە (قوڵایی نەزانراو، شەپۆلی لەناکاو، ساردیی ئاو، بوونی قەڵبەزە و بەردی ژێر ئاو، لێڵی و  نادیاریی بنەکەیەتی) هۆکاری کوشندەن و زۆرجار لە دەرەوەی کۆنتڕۆڵی بەتواناترین کەسیش دان.

دەقی ڕاگەیەندراوەكە بەمجۆرەیە:-

ئاگادارییەکی گرنگ و پڕ بایەخ بۆ سەرجەم هاووڵاتیانی خۆشەویست و گەشتیاران.

هاونیشتمانیانی بەڕێز، گەرمای هاوین و سرووشتی دڵڕفێنی کوردستان، بانکێکی فریودەرن بۆ پەنابردنە بەر سێبەری ئاو و فێنکایی چەم و ڕووبارەکان. جوانیی دیمەنەکان و شەپۆلە هێمنەکانی سەر ئاو، زۆرجار وێنەیەکی خەڵەتێنەر دەخوڵقێنن کە مەترسییە شاراوەکانی ژێر ڕووکەشە ئارامەکە دەشارنەوە.

بەڕێوەبەرایەتی بەرگری شارستانی سلێمانی ، لە سۆنگەی پەرۆشی قووڵی بۆ سەلامەتی گیانی ئێوەی ئازیز و لەبەر ڕۆشنایی ئەو ڕووداوە دڵتەزێن و جەرگبڕانەی کە لە ماوەی ڕابردوودا گیانی چەندین ڕۆڵەی ئەم نیشتمانەیان لێ سەندینەوە، بە ئەرکی سەرشانی خۆی دەزانێت کە بە توندترین شێوە هۆشداریتان پێ بدات سەبارەت بە مەلەکردن لەم شوێنانەی خوارەوە:

_ چەم و ڕووبارەکان: بەتایبەت ئەو ئاوانەی کە لێڵن، بنەکەیان نادیارە، یان خاوەنیشەپۆلی بەهێز و گەردەلوولی ژێر ئاون.

_ گۆم و بەستەرە ئاوییە وەستاوەکان: کە زۆرجار قوڵاییەکەیان نادیارە و زەلکاوی بنەوەیان دەبێتە هۆی گیانی لەدەستدان.

_ هەر شوێنێکی ئاویی دیکە کە بە فەرمی بۆ مەلەکردن دیاری نەکراوە و پێشینەی ڕووداوی خنکانی تێدا تۆمار کراوە.

لێره‌دا پێویسته‌ جه‌خت له‌سه‌ر ئه‌و ڕاستییه‌ بكه‌ینه‌وه‌ كه‌ مەلەکردن لەم جۆرە ئاوانەدا، جیهانێکی تەواو جیاوازە لە مەلەکردن لە مەلەوانگە پارێزراو و ستانداردەکاندا. تەنانەت ئەگەر خۆت بە مەلەوانێکی لێهاتووش بزانیت، سروشتی ئەم ئاوانە (قوڵایی نەزانراو، شەپۆلی لەناکاو، ساردیی ئاو، بوونی قەڵبەزە و بەردی ژێر ئاو، لێڵی و  نادیاریی بنەکەی) هۆکاری کوشندەن و زۆرجار لە دەرەوەی کۆنتڕۆڵی بەتواناترین کەسیشدان.

مەلەوانگەی ستاندارد، ژینگەیەکی کۆنتڕۆڵکراوە و چاودێری ڕاهێنەری لێهاتووی لەسەرە کە لە کاتی هەر حاڵەتێکی نەخوازراودا فریادڕەسی یەکەم دەبن.

بەداخەوە، شایەتحاڵی فرمێسکی گەرم و نزای پڕ لە ئاهی دایکان و باوکان بووین لە کەناری ئەو ئاوانەی کە ساتێک لەمەوبەر جێگەی پێکەنین و خۆشیی جگەرگۆشەکانیان بوون، بەڵام بە چرکەیەک بوونە گۆڕستانی هیوا و ئاواتەکانیان. بینینی ئەو دیمەنە تراژیدیانەی کە خێزانەکان بە دڵێکی شکاو و چاوی پڕ لە گریانەوە، چاوەڕێی دۆزینەوەی جەستەی ئازیزانیان دەکەن، هانیداین کە چیتر ڕێگە بە دووبارەبوونەوەی ئەم کارەساتانە نەدەین.

لەسۆنگەی ئەم ڕووداوە دڵتەزێنانە و لە پێناو پاراستنی سەلامەتی گیانی ئێوەی ئازیز و بۆ ئەوەی گەشت و سەیرانەکانتان تەنها یادگاری خۆش بن نەک زامێکی ساڕێژنەبوو، ڕایدەگەیەنین کە مەلەکردن لە سەرجەم چەم، ڕووبار، گۆم و ئەو شوێنە ئاوییە مەترسیدارانەی کە ئاماژەمان پێکردن، بە توندی قەدەغەیە.

تیمەکانی بەڕێوەبەرایەتیمان بە هاوکاری لایەنە پەیوەندیدارەکان، چاودێری وردی ئەم ناوچانە دەکەن و هەر کەسێک سەرپێچی ئەم ڕێنماییە بکات، ڕووبەڕووی لێپرسینەوەی یاسایی دەبێتەوە. ئەم بڕیارە تەنها و تەنها لە پێناو پاراستنی گیانی بەنرخی خۆتان و ئازیزانتاندایە.

با هەموومان پێکەوە ببینە پارێزەری گیانی یەکتر و هۆشیارانە مامەڵە لەگەڵ جوانییەکانی سروشتدا بکەین. با پێکەنین و کاتە بەنرخەکانی پشوودانمان نەگۆڕین بۆ فرمێسک و پەژارەی تاهەتایی.

لەگەڵ ڕێزی بێ پایانماندا…

عەمیدی مافپەروەر/  دیار ئیبراهیم محێدین

بەڕێوبەری بەرگری شارستانی پارێزگای سلێمانی