"تیمەکان زیادکراون و بە بەلەم و درۆن و فڕۆکە دەگەڕێین"
پێنج رۆژە بێ وچان بەدوای تەرمی مامۆستا ئاڤێستادا دەگەڕێن
964+
ئاکام غەفور – سۆران
پێنج رۆژ بەسەر خنکانی مامۆستا ئاڤێستای تەمەن 27 ساڵ لە رووباری تەنگاتور لە قەزای مێرگەسۆر تێپەڕی و سەرەڕای هەوڵی بەردەوامی تیمەکانی بەرگریی شارستانیی سۆران و خەڵکی دەڤەرەکە لە ژێر باوبۆراندا، هێشتا هیچ سۆراغێکی نییە.
ئەمڕۆ تیمەکانی بەرگریی شارستانیی هەولێر و ئاکرێ بۆ یارمەتیدانی هاوکارەکانیان گەیشتنە سۆران و بە درێژایی 20 کیلۆمەتر کەلێن و کەلەبەری رووبارەکە نەما نەگەڕێن.
کاروان میراودەلی بەڕێوەبەری بەرگریی شارستانیی سۆران لە ژێر لێزمەباراندا قسەی بۆ 964 کرد و وتی، بەبەشداری زیاتر لە 120 کارمەند هەوڵەکانیان بۆ دۆزینەوەی تەرمی مامۆستا ئاڤێستا چڕکردووتەوە، بە ئومێدی ئەوەی لە چەند کاتژمێری داهاتوودا سۆراغێکیان دەست کەوێت.
لە رۆژی دووەمەوە بە دووربین و بەلەم و درۆن و فڕۆکە دەستمان بە گەڕان کردووە
بە قسەی میراودەلی، هەرچەندە هەموو شێوازێکیان بۆ دۆزینەوەی تەرمی ئەو مامۆستایە تاقیکردووەتەوە و لە رۆژی دووەمەوە بە دووربین و بەلەم و درۆن و فڕۆکە دەستیان بە گەڕان کردووە، بەڵام لێڵی و خوڕی ئاوەکە و لێزمەباران گرفتی بۆ دروست کردوون.
ئاماژەی بەوەشکرد، هەندێک جار دۆزینەوەی تەرم لەناو چەم و رووبارەکاندا 18 رۆژ بۆ مانگێک دەخایەنێت، بەڵام ئومێد دەکەن ئەمجارە نەگەنە ئەو مەودا دوورە و زووتر تەرمی ئەو مامۆستایە بدۆزرێتەوە.
ئاڤێستا یوسف بەرزنجی، تەمەن 27 ساڵ، دانیشتووی هەولێر، پێشنیوەڕۆی رۆژی 5.4.2025 کەوتە ناو رووباری تەنگاتوور لە قەزای مێرگەسۆر و تائێستا بێسەروشوێنە.
پێداچوونەوە: شۆڕش قادری
