لە سنە 11 تۆن گۆشتی هێستر دەستی بەسەرداگیراوە - وێنە: ئیرنا
ویستراوە لە بازاڕ ساغ بکرێتەوە
لە سنە 11 تۆن گۆشتی هێستر دەستی بەسەرداگیراوە
964+
شۆڕش قادری
لە ماوەی نزیکەی یەک ساڵدا 11 تۆن گۆشتی هێستر لە پارێزگای سنەی رۆژهەڵاتی کوردستان دەستی بەسەرداگیراوە، کە کەسانێک ویستوویانە لە بازاڕ ساغی بکەنەوە و بیفرۆشن.
ئاژانسی هەواڵی ئیرنا لەزاری کامەران زیباکردار بەڕێوەبەری گشتیی ڤێتەرنەری پارێزگای سنە بڵاویکردەوە، لە 21.3.2024 تا ئەمڕۆ، 11 هەزار کیلۆ گۆشتی هێستر لە ناوچە جیاجیاکانی ئەو پارێزگایە دەستی بەسەرداگیراوە و لەناوبراوە کە ویستراوە لە بازاڕدا بفرۆشرێت و ساغ بکرێتەوە، لە پەیوەندی بەو بابەتەش 32 کەس دەستگیر کراون و رووبەڕووی یاسا کراونەتەوە.
ئاماژەی بەوەشکردووە، لیژنەکانیان بەردەوام پشکنین و بەدواداچوون بۆ گۆشتفرۆش و چێشتخانە و مارکێتەکان دەکەن و لەو شوێنانە، بوونی گۆشتی هێستر بەدینەکراوە.
بەڕێوەبەری ڤێتەرنەری پارێزگای سنە داوایشی لە خەڵک کردووە، خۆیان بپارێزن لە کڕینی گوشتی سەر جادەکان و گۆشتفرۆشە گەڕۆکەکان و ئەگەر حاڵەتێکی گوماناوییان بینی، لیژنەکانیان ئاگادار بکەنەوە.
