لە چەند رۆژی داهاتوودا بەفرەکە دەگات

964+

ژێوار خدر

خۆتان ئامادە بکەن لە چەند رۆژی داهاتوودا لە زۆربەی ناوچەکانی کوردستان بەفر دەبارێت و پێناچێت ئەم جارەش پارێزگای هەولێر بگرێتەوە.

کەشوهەوای هەرێمی کوردستان دەڵێت، لە سبەی شەوەوە شەپۆلێکی باران بارین دەستپیدەکات و لەگەڵێشیدا پلەکانی گەرماش نزم دەبنەوە و پێشبینی دەکرێت ئەم شەپۆلی باران و بەفرە تا رۆژی یەکشەممەی داهاتوو بەردەوام بێت.

بەپێی کەشناسی هەرێم، زۆرترین دابارین لە رۆژی پێنجشەممەدا دەبیت، ئەوەش  لە ئەنجامى یەکگرتنى دوو نزمە پاڵە پەستۆى دەریاى ناوەڕاست و دەریاى سوور دەبێت.

دەشڵێت، لەگەڵ دەستپێکردنى باران بارین، لە ناوچە سنووریەکان بەفر بارینیش دەست پێ دەکات، بەڵام لە ئەنجامى هاتنى بارستە هەواییەکى ساردتر بەفر بارین، دێتە سەنتەری پارێزگاى دهۆک و سلێمانى و هەڵەبجەو ئیدارەى راپەڕین و زاخۆ.

ئاماژەی بەوەشکردووە، لەگەڵ نزم بوونەوەى زیاترى پلەکانى گەرما بەفر بارین تا ئاستى 600 مەتر بە تێکەڵى لەگەڵ باران دەبارێت .