کۆڕبەندی ئابووری لە نێوان ئیتاڵیا و هەرێمی کوردستان لە رۆما بەڕێوەدەچێت - وێنە: ژووری بازرگانی هەولێر
کۆڕبەندی ئابووری بەڕێوەدەچێت
لە پەرلەمانی ئیتاڵیا یادداشتنامەیەکی تایبەت بە پڕۆژەیەکی گەشتیاری لە سۆران ئیمزا کرا
964+
شۆڕش قادری
یەکەم کۆڕبەندی ئابووری ئەمساڵ لە نێوان ئیتاڵیا و هەرێمی کوردستان بەڕێوەدەچێت و تیایدا یادداشتنامەیەکی تایبەت بە بنیاتنانی پڕۆژەیەکی گەشتیاری لە سۆران ئیمزا کرا.
مەعروف هەرکی جێگری سەرۆکی ژووری بازرگانی هەولێر بە 964ـی وت، “بە ئامانجی کارکردنی هاوبەش لە سێکتەرە جیاوازەکان و وەبەرهێنان کردن لە هەردوولا، ئەمڕۆ سێشەممە 11.2.2025 یەکەم کۆڕبەندی ئابووری ئەمساڵ لە نێوان وڵاتی ئیتاڵیا و هەرێمی کوردستان لە پەرلەمانی ئیتاڵیا لە شاری رۆما سازکرا و بۆ ماوەی دوو رۆژ بەردەوام دەبێت”.
بەقسەی مەعروف هەرکی، کۆڕبەندە بەئامادەبوونی بێگەر تاڵەبانی، وەزیری کشتوکاڵ و سەرچاوەکانی ئاوی هەرێم، سەفین دزەیی، بەرپرسی فەرمانگەی پەیوەندیەکانی دەرەوە، محەممەد شوکری، سەرۆکی دەستەی وەبەرهێنان، لاوەند مەموندی، ئەندامی ئەنجومەنی کارگێڕی و نوێنەری ژووری بازرگانی و پیشەسازی هەولێر، سەرۆکی ژوورەکانی بازرگانی سلێمانی، دهۆك و هەڵەبجە و ژمارەیەک لە سەرمایەدار، بازرگانان و وەبەرهێنەرانی کوردستان و ئیتاڵیا بەڕێوەدەچیت.
ئاماژەی بەوەشکرد، لە یەکەم رۆژی کۆڕبەندەکە، یاداشتنامەیەکی لێکتێگەیشتن لە نێوان (Visit Kurdistan) و کۆمپانیایەکی ئیتاڵی ئیمزا کراوە بۆ پێشخستنی کەرتی گەشتیاری لە هەرێمی کوردستان، تایبەت بە بنیاتنانی پڕۆژەیەکی گەشتیاری لە دەڤەری سۆران، کە بڕیارە لە شەش مانگی داهاتوو کۆمپانیاکە دەست بە کارەکانی بکات.
دەروازەى ناوچە گەشتیارییەکانى سۆران بێ هۆتێلە
