34 ساڵە خۆپیشاندان و مانگرتن نەبووە حەمەی مانگری تێدا نەبێت

دیلان محەمەد – سلێمانی

محەمەد عەبدولقادر لەناو خەڵکی بە حەمەی مانگر ناسراوە، چونکە 34 ساڵە لە هەموو ناڕەزایەتییەکانی سلێمانی بەشدارە و خۆپیشاندان و مانگرتن نەبووە، ئەم پیاوەی تیا نەبێت.

یەکەمجار حەمەی مانگر لەگەڵ 24 گەنجی تر و لە رۆژی 05.12.1991  لەبەردەم بارەگای نەتەوە یەکگرتووەکان لە سلێمانی مانگرتنیان لە خواردن و خواردنەوە راگەیاند و داوایان دەکرد نەتەوە یەکگرتووەکان مافەکانی کورد دابین بکات.

ئەوکات مانگرتووان وەک هێمایەک بۆ بێباکییان بە ژیان، لەناو تابوتدا دەمانەوە و رۆژانە خەڵکێکی زۆر سەردانیان دەکردن و چەندین سروود و گۆرانیشیان بۆ دروستکرا.

لەو کاتەوە تائێستا هەرچی خۆپیشان و مانگرتن رووبدات حەمەی مانگری تێدایە، ئێستاش پشتیوانی مامۆستا مانگرتووەکانی سلێمانییە و رۆژانە سەردانیان دەکات و چا و قاوەیان بۆ ئامادە دەکات.

پێداچوونەوە: شۆڕش قادری