دیمەنی یەکێک لەو زەوییانەی لەلایەن تیمەکانی پاریزگای هەولێرەوە تێکدەدرێ بەهۆی بەکارهێنانی ئاوی قورسەوە وێنە: پارێزگای هەولێر
سەوزەیان بە ئاوی زێراب بەرهەم دەهێنا
500 دۆنم زەوی و زیاد لە 100 خانووی پلاستیکی لە هەولێر تێکدران
964+
ژێوار خدر
هەولێر بەردەوامە لە پاککردنەوەی ئەو زەویانەی سەوزە بەرهەم دەهێنن و بە ئاوی پیس ئاو دەدرێن.
پارێزگای هەولێر، هەڵمەتێکی چەند هەفتەیی دەستپێکردووە و ئەو شوێنانە پاکدەکاتەوە کە سەوزە بەرهەم دەهێنن، بەڵام بە ئاوی پیس سەوزەکان ئاو دەدەن.
پارێزگاکە لە درێژەی هەڵمەتەکەیدا رایگەیاند، لیژنەی لادانی داچێندراوی پارێزگا، زیاتر لە 500 دۆنم زەوییان پاککردووەتەوە و زیاتر لە 100 خانووی پلاستیکیشیان تێکداوە کە بەشێوەی زێدەڕۆ لەسەر ئاوی زێراب و ئاوەڕۆ و ئاوی قورس دروستکرابوون و سەوزەیان لێ بەرهەم دەهێنرا.
رۆژی پێنجشەممە 16.1.2025 لەلایەن تیمەکانیان لە سەرۆکایەتیی شارەوانیی هەولێر و بە هەماهەنگی لەگەڵ لیژنەی هاوبەشی بەدواداچوونی هۆکارەکانی پیسبوونی ژینگەی هەولێر، دەستكرا بە هەڵمەتێکی فراوانی لادان و راگرتنی کارەکانی هەموو ئەو زەوییانەی بە نایاسایی و بەبێ مەرج و رێنمایی تەندروستی كارى كشتوکاڵی سەوزەی تێدا دەکرێت، كە بە ئاوی قورس و پاشماوەی ماڵان ئاو دەدرێت و سەرچاوەکەی ئاوی پیسی ماڵانە، ئەمەش هۆکارێکی سەرەکییە بۆ تووشبوون بە نەخۆشییە گوازراوەکان.
